గగన్‌యాన్‌ దిశగా మరో ముందడుగు.. మూడు కీలక పరీక్షలు విజయవంతం

మానవసహిత అంతరిక్ష యాత్ర ‘గగన్‌యాన్‌’ను విజయవంతం చేసేందుకు భారత అంతరిక్ష పరిశోధన సంస్థ (ఇస్రో) కీలక దశలో సన్నాహాలు కొనసాగిస్తోంది. వ్యోమగాములను అంతరిక్షంలోకి తీసుకెళ్లి సురక్షితంగా తిరిగి భూమిపైకి తీసుకురావడమే లక్ష్యంగా క్రూ మాడ్యూల్‌ వ్యవస్థల సామర్థ్యాన్ని నిర్ధారించే పరీక్షలను వరుసగా నిర్వహిస్తోంది.

తాజాగా నిర్వహించిన మూడు ప్రధాన పరీక్షలు గగన్‌యాన్‌ మిషన్‌లో అత్యంత కీలకమైనవిగా ఇస్రో వర్గాలు పేర్కొన్నాయి. వ్యోమగాముల భద్రత, మాడ్యూల్‌ పనితీరు, తిరిగి భూమికి చేరే సమయంలో ఎదురయ్యే పరిస్థితులను దృష్టిలో ఉంచుకుని ఈ పరీక్షలు చేపట్టారు.

మొదటి పరీక్షలో సముద్రంలో దిగిన తర్వాత క్రూ మాడ్యూల్‌ స్థిరంగా ఉండే విధానాన్ని పరిశీలించారు. అంతరిక్షం నుంచి తిరిగి వచ్చిన సమయంలో మాడ్యూల్‌ సముద్ర జలాల్లో పడినప్పుడు అది తలకిందులుగా కాకుండా సరైన స్థితిలో ఉండటం చాలా కీలకం. ఈ వ్యవస్థ పనితీరును పరీక్షించి విజయవంతంగా ధ్రువీకరించారు.

రెండో పరీక్షలో క్రూ మాడ్యూల్‌, సర్వీస్‌ మాడ్యూల్‌ మధ్య అనుసంధానంగా పనిచేసే అంబ్లికల్‌ వ్యవస్థ విడిపోయే ప్రక్రియను పరిశీలించారు. ప్రయోగ సమయంలో రెండు మాడ్యూళ్లు కలిసి పనిచేసినప్పటికీ, నిర్దిష్ట దశలో అవి సురక్షితంగా విడిపోవడం అవసరం. సీఎస్‌యూ-1, సీఎస్‌యూ-2 భాగాలుగా ఉండే ఈ వ్యవస్థలో సిమ్యులేటెడ్‌ క్రూ మాడ్యూల్‌ నుంచి సీఎస్‌యూ-2 విడిపోయే ప్రక్రియను ఇస్రో శాస్త్రవేత్తలు విజయవంతంగా పరీక్షించారు.

మూడో పరీక్షలో క్రూ మాడ్యూల్‌కు అమర్చిన కవర్‌ విడిపోయే సమయంలో మాడ్యూల్‌ నిర్మాణ దృఢత్వాన్ని పరిశీలించారు. ఈ కవర్‌ ప్రయోగ సమయంలో పారాచూట్లు, ఇతర ముఖ్యమైన ఉప వ్యవస్థలను రక్షిస్తుంది. తిరుగు ప్రయాణంలో సరైన సమయంలో ఇది విడిపోవడం మిషన్‌ విజయానికి కీలకం.

గగన్‌యాన్‌ మిషన్‌లో భాగంగా ఇస్రో ఇప్పటికే పలు కీలక పరీక్షలను పూర్తి చేసింది. మానవులను అంతరిక్షంలోకి పంపే ముందు మానవరహిత ప్రయోగాలు, భద్రతా వ్యవస్థల పరీక్షలు, వ్యోమగాముల శిక్షణ వంటి అంశాలపై సంస్థ ప్రత్యేక దృష్టి పెట్టింది.

భారత్‌ చేపడుతున్న తొలి మానవసహిత అంతరిక్ష యాత్రగా గగన్‌యాన్‌ ప్రపంచ అంతరిక్ష రంగంలో దేశ ప్రతిష్ఠను మరింత పెంచే ప్రాజెక్టుగా నిలవనుంది. ఈ మిషన్‌ విజయవంతమైతే, మానవులను అంతరిక్షంలోకి పంపిన దేశాల సరసన భారత్‌ చేరనుంది.