రుణ బకాయిల వసూళ్ల ప్రక్రియలో భాగంగా బ్యాంకులు స్వాధీనం చేసుకున్న స్థిరాస్తుల నిర్వహణపై భారతీయ రిజర్వ్ బ్యాంక్ (ఆర్బీఐ) కీలక మార్గదర్శకాలను విడుదల చేసింది. స్వాధీనం చేసుకున్న ఆస్తులను తిరిగి అదే రుణగ్రహీతకు లేదా సంబంధిత వ్యక్తులకు విక్రయించరాదని బ్యాంకులకు స్పష్టం చేసింది.
బ్యాంకులు సాధారణంగా తమ రుణ కార్యకలాపాల్లో భాగంగా ఆర్థికేతర ఆస్తులను స్వాధీనం చేసుకోవని ఆర్బీఐ పేర్కొంది. అయితే రుణాలు చెల్లించకుండా మొండి బకాయిలుగా మారిన సందర్భాల్లో, చట్టపరమైన చర్యలు ప్రారంభించిన తర్వాత మాత్రమే రుణ భద్రతగా ఉన్న స్థిరాస్తులను స్వాధీనం చేసుకుంటాయని తెలిపింది.
స్వాధీనం చేసుకున్న స్థిరాస్తులు, ఇతర బ్యాంకింగేతర ఆస్తుల నిర్వహణలో పారదర్శకత తీసుకురావడం, బ్యాంకుల బ్యాలెన్స్ షీట్లలో సరైన విలువలను చూపించడం లక్ష్యంగా ఈ నిబంధనలు తీసుకొచ్చినట్లు ఆర్బీఐ వెల్లడించింది.
ఆర్బీఐ కొత్త మార్గదర్శకాల్లో ముఖ్యాంశాలు:
- బ్యాంకులు స్వాధీనం చేసుకున్న ఆస్తులను తమ అంతర్గత విధానాల్లో నిర్ణయించిన గడువులోపు విక్రయించాలి. అయితే గరిష్ఠంగా ఏడేళ్లలోపు ఆస్తుల విక్రయం పూర్తి చేయాల్సి ఉంటుంది.
- స్వాధీనం చేసుకున్న ఆస్తులను సాధ్యమైనంత త్వరగా బహిరంగ వేలం (ఆక్షన్) విధానం ద్వారా విక్రయించాలని సూచించింది.
- ఆస్తుల విలువ నిర్ణయంలో మరింత పారదర్శకత పాటించాలని పేర్కొంది. స్వాధీనం చేసుకున్న వెంటనే ఆ ఆస్తులను రుణ పుస్తకాల్లోని రద్దయిన విలువ లేదా బయట నుంచి నియమించిన ఇద్దరు స్వతంత్ర విలువ నిర్ధారకులు నిర్ణయించిన విలువలో ఏది తక్కువ అయితే ఆ మొత్తంతో బ్యాలెన్స్ షీట్లో నమోదు చేయాలి.
- బ్యాంకులు తమ కార్యాలయ అవసరాలు లేదా ఇతర వినియోగాల కోసం స్వాధీనం చేసుకున్న స్థిరాస్తులను ఇకపై స్పెసిఫైడ్ నాన్ ఫైనాన్షియల్ అసెట్స్గా పరిగణించకూడదు. వాటిని సంబంధిత ఫిక్స్డ్ అసెట్స్ విభాగంలో నమోదు చేయాలి.
ఈ నిబంధనలు అమల్లోకి వచ్చిన తర్వాత బ్యాంకులు స్వాధీనం చేసుకున్న ఆస్తులను ఎక్కువ కాలం తమ వద్ద ఉంచుకోవడాన్ని తగ్గించే అవకాశం ఉంది. అలాగే ఆస్తుల నిజమైన విలువను ప్రతిబింబించేలా లెక్కలు నిర్వహించేందుకు వీలవుతుందని ఆర్బీఐ భావిస్తోంది.
కొత్త నిబంధనలు అక్టోబర్ 1 నుంచి అమల్లోకి రానున్నాయి. బ్యాంకులు తమ అంతర్గత విధానాలను ఈ మార్గదర్శకాలకు అనుగుణంగా మార్చుకోవాల్సి ఉంటుంది. రుణాల రికవరీ ప్రక్రియలో వేగం, పారదర్శకత పెంచడం ఈ మార్పుల ప్రధాన ఉద్దేశంగా తెలుస్తోంది.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government India IndianCinema IndiaNews InternationalNews LatestNews MarketUpdate MovieNews News NewsToday NewsUpdate PoliticalNews PublicSafety shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews WorldNews
