సీటు బెల్ట్‌ విషయంలో నిబంధనలే ఫైనల్‌.. విమాన సర్వీసు రద్దు

కెనడాలో చోటుచేసుకున్న ఓ ఘటన విమాన ప్రయాణాల్లో చిన్నారుల భద్రత, సీటు బెల్ట్‌ నిబంధనల ప్రాధాన్యాన్ని మరోసారి చర్చకు తెచ్చింది. ఓ చిన్నారి సీటులో సురక్షితంగా కూర్చోకుండా, సీటు బెల్ట్‌ పెట్టుకోవడానికి నిరాకరించడంతో విమాన సర్వీసును రద్దు చేయాల్సి వచ్చింది. దీంతో విమానంలోని ఇతర ప్రయాణికులు రాత్రంతా విమానాశ్రయంలోనే ఉండాల్సి వచ్చింది.

ఆగస్టు 6న విక్టోరియా అంతర్జాతీయ విమానాశ్రయం నుంచి టొరంటోకు వెళ్లాల్సిన పోర్టర్‌ ఎయిర్‌లైన్స్‌ విమానం ప్రయాణానికి సిద్ధమైంది. గేటు నుంచి కదిలి రన్‌వే వైపు వెళ్తున్న సమయంలో ఓ చిన్నారి తన సీటుపై పదేపదే నిలబడింది.

తల్లిదండ్రులు చిన్నారిని సీటులో కూర్చోబెట్టి సీటు బెల్ట్‌ పెట్టేందుకు ప్రయత్నించారు. విమాన సిబ్బంది కూడా వారికి సహకరించారు. అయినప్పటికీ చిన్నారిని సురక్షితంగా సీటులో ఉంచడం సాధ్యం కాలేదు.

భద్రత విషయంలో రాజీ లేదు :

టేకాఫ్‌కు ముందు ప్రయాణికులు నిర్దేశిత విధంగా సీటులో సురక్షితంగా కూర్చోవడం, సీటు బెల్ట్‌ ధరించడం తప్పనిసరి. చిన్నారి విషయంలో ఈ నిబంధనను అమలు చేయలేకపోవడంతో విమానాన్ని ముందుకు తీసుకెళ్లడం సురక్షితం కాదని సిబ్బంది నిర్ణయించారు.

దీంతో విమానం రన్‌వే నుంచి తిరిగి టెర్మినల్‌కు వచ్చింది. అనంతరం చిన్నారిని, అతడి తల్లిదండ్రులను విమానం నుంచి దించారు. ఈ ప్రక్రియ పూర్తయ్యే సమయానికి అర్ధరాత్రి దాటిపోయింది.

రన్‌వే మూసివేతతో మరింత ఆలస్యం :

అప్పటికే రాత్రి 12.30 గంటలు దాటడంతో విక్టోరియా అంతర్జాతీయ విమానాశ్రయంలో రన్‌వే మూసివేశారు. దీంతో ఆ రోజు విమానాన్ని తిరిగి నడపడానికి అవకాశం లేకుండా పోయింది. ఫలితంగా విమానంలోని మిగిలిన ప్రయాణికులు కూడా దిగాల్సి వచ్చింది.

విమానాన్ని మరుసటి రోజుకు రీషెడ్యూల్‌ చేయడంతో ప్రయాణికులు రాత్రంతా విక్టోరియాలోనే ఉండాల్సి వచ్చింది. జరిగిన అసౌకర్యానికి విమానయాన సంస్థ ప్రయాణికులకు క్షమాపణలు తెలిపింది.

ఈ ఘటనలో విమాన సిబ్బంది చిన్నారి భద్రత విషయంలో నిబంధనలను పాటించడానికే ప్రాధాన్యం ఇచ్చినప్పటికీ, దాని ప్రభావం మిగిలిన ప్రయాణికుల ప్రయాణంపైనా పడింది.