యాదగిరిగుట్టలో భక్తులకు దళారుల ‘వీఐపీ’ ప్యాకేజీలు

యాదగిరిగుట్ట పుణ్యక్షేత్రంలో భక్తుల దర్శనాలను అడ్డుపెట్టుకుని దళారులు గుట్టుచప్పుడు కాకుండా దందా సాగిస్తున్నట్లు ఆరోపణలు వస్తున్నాయి. ప్రత్యేక దర్శనం, కొండపైకి వాహన ప్రవేశం, వేదాశీర్వచనం, అన్నప్రసాదం, భోజనం, బస.. ఇలా భక్తుల అవసరాలకు అనుగుణంగా ప్యాకేజీలు మాట్లాడుకుని డబ్బులు వసూలు చేస్తున్నట్లు తెలుస్తోంది.

‘‘మేం గుట్టకు వస్తున్నాం.. స్వామి దర్శనం, భోజనం, బస ఏర్పాట్లు నీవే చూడాలి’’ అంటూ ఓ భక్తుడు దళారిని సంప్రదించగా.. ‘‘ఎంతమంది వస్తారు? కారు నంబరు, భోజన మెనూ వివరాలు పంపండి. అన్నీ నేను చూసుకుంటా’’ అంటూ అతడు సమాధానం ఇచ్చాడు. ప్రత్యేక దర్శనం కోసం 10 మందికి రూ.2 వేల చొప్పున ఫోన్‌పే చేయాలని కోరినట్లు సమాచారం.

హైదరాబాద్‌ నుంచి 11 మందితో కూడిన ఓ కుటుంబం ఇటీవల యాదగిరిగుట్టకు వచ్చింది. కొండ కింద ఓ ప్రైవేట్‌ లాడ్జిలో బస చేసిన కుటుంబ సభ్యులు ఉదయాన్నే స్వామివారి దర్శనం చేసుకోవాలని భావించారు. లాడ్జి నిర్వాహకులను సంప్రదించగా.. వారు ఓ వ్యక్తిని పరిచయం చేశారు. అతడి సహాయంతో కొండపైకి వెళ్లిన కుటుంబం గంటలోపే దర్శనం పూర్తి చేసుకుని తిరిగి వచ్చింది. ఇందుకు రూ.1,500 చెల్లించినట్లు తెలిసింది.

సాధారణంగా భక్తులు నిర్దేశిత విధానంలో దర్శన టికెట్లు తీసుకుని ఆలయంలోకి వెళ్లాల్సి ఉంటుంది. అయితే దళారులు మాత్రం ఎలాంటి టికెట్లు తీసుకోకుండానే తమ పరిచయాల ద్వారా నేరుగా దర్శనం చేయిస్తున్నట్లు ఆరోపణలు ఉన్నాయి.

రియల్‌ ఎస్టేట్‌ బ్రోకర్లు, స్థానికంగా పరిచయాలు ఉన్న కొందరు వ్యక్తులు, చిన్నాచితకా నాయకులు భక్తులతో ప్యాకేజీలు మాట్లాడుకుని ఈ వ్యవహారాన్ని నడిపిస్తున్నట్లు సమాచారం. కొండ కింద ఉన్న ప్రైవేట్‌ లాడ్జిలు, సత్రాలు, ఆలయ కాటేజీల వద్ద భక్తులను గుర్తించి వారితో బేరసారాలు చేస్తున్నట్లు తెలుస్తోంది.

ఈ వ్యవహారంలో కొండ కింద నుంచి భక్తులను వాహనాల్లో కొండపైకి తీసుకెళ్లేందుకు ఒక బృందం, కొండపైకి చేరుకున్న తర్వాత దర్శనం చేయించేందుకు మరో బృందం పనిచేస్తున్నట్లు ఆరోపణలు ఉన్నాయి. ఇలా గొలుసుకట్టు వ్యవస్థగా దళారుల కార్యకలాపాలు కొనసాగుతున్నాయని భక్తులు చెబుతున్నారు.

దర్శనాల కోసం భక్తులను క్రమబద్ధంగా పంపించే వ్యవస్థలో లోపాలు ఉండటంతో దళారులకు అవకాశం ఏర్పడుతోందన్న విమర్శలు ఉన్నాయి. భక్తులు అధికారికంగా టికెట్లు కొనుగోలు చేయకుండా దళారుల ద్వారా దర్శనం చేసుకుంటే ఆలయానికి రావాల్సిన ఆదాయానికి గండి పడే అవకాశం ఉంది. శ్రావణ మాసంలో భక్తుల రద్దీ పెరగడంతో ఈ తరహా దందా మరింత పెరిగినట్లు ఆరోపణలు వినిపిస్తున్నాయి.

యాదగిరిగుట్టలో దర్శనాల పేరుతో జరుగుతున్న దందాను అరికట్టేందుకు చర్యలు తీసుకుంటామని ఆలయ ఈవో భవానీశంకర్‌ తెలిపారు. నిఘా వ్యవస్థను మరింత బలోపేతం చేస్తామని, సమస్యను ట్రస్టుబోర్డు దృష్టికి తీసుకెళ్లి కట్టుదిట్టమైన విధానాలను అమలు చేసేలా ఆదేశాలు జారీ చేస్తామని చెప్పారు.