నేపాల్‌లో తల్లిదండ్రులు గల్లంతు.. తీవ్ర విషాదంలోనూ నీట్‌ పరీక్ష రాసిన తన్వి

కైలాస మానసరోవర యాత్ర కోసం నేపాల్‌కు వెళ్లిన వందలాది మంది భారతీయుల ఆచూకీ వరదల కారణంగా గల్లంతైన నేపథ్యంలో విషాదకర ఘటన వెలుగులోకి వచ్చింది. యాత్రకు వెళ్లిన తన తల్లిదండ్రుల జాడ తెలియకపోయినా.. వారి కోరికను నెరవేర్చేందుకు ఓ వైద్య విద్యార్థిని తీవ్ర మానసిక వేదన మధ్య నీట్‌ పరీక్షకు హాజరయ్యారు.

తన్వి అనే నీట్‌ అభ్యర్థి తన తల్లిదండ్రులు వెంకట్రామ్‌ అన్నందేవర, అనఘ 67 మందితో కూడిన బృందంతో కలిసి కైలాస మానసరోవర యాత్రకు వెళ్లినట్లు తెలిపారు. నేపాల్‌లోని ఇమిగ్రేషన్‌ కేంద్రం వద్ద ఉన్న సమయంలోనే వారితో చివరిసారిగా మాట్లాడినట్లు చెప్పారు. ఆ తర్వాత నుంచి వారి నుంచి ఎలాంటి సమాచారం లేకపోవడంతో తీవ్ర ఆందోళనకు గురవుతున్నట్లు వెల్లడించారు.

అయినప్పటికీ తన తల్లిదండ్రుల కోరిక మేరకు నీట్‌ పరీక్ష రాయాలని నిర్ణయించుకున్నట్లు తన్వి తెలిపారు.

‘‘మూడు గంటల పరీక్షా సమయంలో దాదాపు సగం సమయం కన్నీళ్లతోనే గడిచింది. నా అడ్మిట్‌ కార్డుపై ఉన్న ఫొటోను మా నాన్నే తీశారు. పరీక్ష రాస్తున్న సమయంలో ఆ ఫొటో కనిపించిన ప్రతిసారీ ఆయన గుర్తుకొచ్చారు. మానసికంగా ఎంతో సంఘర్షణకు గురైనా అమ్మానాన్నల కోరిక మేరకు పరీక్ష తప్పకుండా రాయాలని నిర్ణయించుకున్నాను’’ అని తన్వి ఆవేదన వ్యక్తం చేశారు.

తన భవిష్యత్తు గురించి తల్లిదండ్రులు ఎన్నో కలలు కన్నారని ఆమె తెలిపారు. తాను ఏ పరీక్ష రాయడానికి వెళ్లినా మంచి మార్కులు సాధించాలని కోరుకుంటూ తన తల్లి పెరుగులో పంచదార కలిపి తినిపించేదని గుర్తుచేసుకున్నారు. ఇప్పుడు ఆమె తన పక్కన లేకపోవడం మరింత బాధకు గురిచేస్తోందని కన్నీటి పర్యంతమయ్యారు.

తీవ్ర విషాదంలోనూ పరీక్ష రాసిన తన్వి.. తల్లిదండ్రులు సురక్షితంగా తిరిగి వస్తారనే ఆశతో ఎదురుచూస్తున్నట్లు తెలిపారు. తన భవిష్యత్తు కోసం వారు కన్న కలలను సాకారం చేయడమే తన ముందున్న లక్ష్యమని పేర్కొన్నారు.

కైలాస మానసరోవర యాత్రకు వెళ్లిన పలువురు భారతీయులు నేపాల్‌లోని వరదలు, ప్రతికూల వాతావరణ పరిస్థితుల కారణంగా చిక్కుకుపోయినట్లు సమాచారం. ఈ నేపథ్యంలో గల్లంతైన వారి ఆచూకీ కోసం సహాయక బృందాలు గాలింపు చర్యలు కొనసాగిస్తున్నాయి.