గేట్‌ స్కోరుతో ఎంటెక్‌ మాత్రమే కాదు.. ఈ కోర్సుల్లోనూ ప్రవేశం!

గేట్‌ అంటే ఎంటెక్‌.. ఇంజినీరింగ్‌ పీజీ కోర్సులకే ఉపయోగపడుతుంది అనుకోవడం సహజం. కానీ ప్రస్తుతం గేట్‌ పరిధి అంతకుమించి విస్తరించింది. ఇంజినీరింగ్‌తో పాటు కొన్ని పబ్లిక్‌ పాలసీ, మేనేజ్‌మెంట్‌, డిజైన్‌, అర్బన్‌ ప్లానింగ్‌, హ్యుమానిటీస్‌, సోషల్‌ సైన్సెస్‌, ఇంటర్‌ డిసిప్లినరీ రంగాల్లోని పీజీ, పరిశోధన కోర్సులకు కూడా గేట్‌ స్కోరును పరిగణిస్తున్నాయి.

పబ్లిక్‌ పాలసీ, మేనేజ్‌మెంట్‌: ఐఐటీ బాంబేలో మాస్టర్‌ ఆఫ్‌ పబ్లిక్‌ పాలసీ వంటి కోర్సులకు గేట్‌ స్కోరు ఉపయోగపడుతుంది. పాలన, ప్రజా విధానాల రూపకల్పన, అభివృద్ధి ప్రణాళిక, సామాజిక సమస్యల విశ్లేషణ వంటి రంగాల్లో కెరీర్‌ కోరుకునేవారికి ఇవి ఉపయోగకరంగా ఉంటాయి. ఐఐఎస్సీ బెంగళూరులోని మాస్టర్‌ ఆఫ్‌ మేనేజ్‌మెంట్‌ వంటి కొన్ని ప్రోగ్రామ్‌లకు కూడా నిర్దిష్ట విద్యార్హతలతో గేట్‌ స్కోరును పరిగణించే అవకాశం ఉంది.

డిజైన్‌, ప్లానింగ్‌: గేట్‌ స్కోరు కొన్ని డిజైన్‌, ఆర్కిటెక్చర్‌, అర్బన్‌ ప్లానింగ్‌ కోర్సుల్లోనూ ఉపయోగపడుతోంది. ఐఐఎస్సీలో మాస్టర్‌ ఆఫ్‌ డిజైన్‌తో పాటు ఐఐటీ ఖరగ్‌పూర్‌, ఐఐటీ రూర్కీ వంటి సంస్థల్లో సిటీ ప్లానింగ్‌, అర్బన్‌ అండ్‌ రూరల్‌ ప్లానింగ్‌, ఆర్కిటెక్చర్‌కు సంబంధించిన కొన్ని పీజీ ప్రోగ్రామ్‌లకు గేట్‌ స్కోరును పరిగణించే అవకాశం ఉంది. అయితే బీటెక్‌, బీఆర్క్‌, బీప్లానింగ్‌, బీడిజైన్‌ వంటి నిర్దిష్ట అండర్‌గ్రాడ్యుయేట్‌ అర్హతలు అవసరం కావచ్చు.

హ్యుమానిటీస్‌, సోషల్‌ సైన్సెస్‌: గేట్‌లో ఇంజినీరింగ్‌ సబ్జెక్టులతో పాటు ఎకనామిక్స్‌, ఇంగ్లిష్‌, లింగ్విస్టిక్స్‌, ఫిలాసఫీ, సైకాలజీ, సోషియాలజీ వంటి పేపర్లు కూడా ఉన్నాయి. దీంతో నాన్‌-ఇంజినీరింగ్‌ నేపథ్యం ఉన్న విద్యార్థులు తమ విద్యార్హతకు అనుగుణంగా గేట్‌ రాసి కొన్ని ఉన్నత విద్య, పరిశోధన అవకాశాలను అన్వేషించవచ్చు.

సైన్స్‌, ఇంటర్‌ డిసిప్లినరీ రంగాలు: మ్యాథమెటిక్స్‌, స్టాటిస్టిక్స్‌, ఫిజిక్స్‌, కెమిస్ట్రీ, లైఫ్‌ సైన్సెస్‌ వంటి విభాగాలకు సంబంధించిన గేట్‌ పేపర్లు కూడా ఉన్నాయి. కాగ్నిటివ్‌ సైన్స్‌ వంటి ఇంటర్‌ డిసిప్లినరీ రంగాల్లోనూ గేట్‌ స్కోరు కొన్ని విద్యా, పరిశోధన అవకాశాలకు ఉపయోగపడుతుంది.

పీహెచ్‌డీ, పరిశోధన: కంప్యూటర్‌ సైన్స్‌, సైకాలజీ, లింగ్విస్టిక్స్‌, ఫిలాసఫీ తదితర విభాగాల్లో చదివిన విద్యార్థులు సంబంధిత అర్హతలు ఉంటే కొన్ని ఐఐటీల్లో పీహెచ్‌డీ లేదా ఇతర పరిశోధన ప్రోగ్రామ్‌లకు గేట్‌ స్కోరుతో దరఖాస్తు చేసుకునే అవకాశం ఉంటుంది.

ముఖ్యంగా గుర్తుంచుకోవాల్సింది: ఒక గేట్‌ పేపర్‌ అన్ని కోర్సులకు వర్తించదు. అభ్యర్థి విద్యార్హత, రాసిన గేట్‌ పేపర్‌, ఎంపిక చేసుకునే కోర్సు, సంబంధిత విద్యాసంస్థ నిబంధనల ఆధారంగా అర్హత మారుతుంది. కాబట్టి దరఖాస్తు చేసే ముందు ఆయా ఐఐటీలు, ఐఐఎస్సీ లేదా సంబంధిత విద్యాసంస్థ విడుదల చేసే తాజా ప్రవేశ నోటిఫికేషన్‌ను తప్పనిసరిగా పరిశీలించాలి.