పంటి సందుల్లోకీ ఏఐ నిఘా.. డైసన్‌ స్మార్ట్‌ బ్రష్‌

ఇప్పటివరకు టూత్‌బ్రష్‌తో పళ్లు తోముకోవడం, ఆ తర్వాత ఫ్లాసింగ్‌ చేయడం, అవసరమైతే మౌత్‌వాష్‌ ఉపయోగించడం సాధారణం. అయితే ఈ మూడు దశల్లో కొన్నింటిని ఒకే పరికరంతో సులభతరం చేసే లక్ష్యంతో డైసన్‌ కొత్త స్మార్ట్‌ టూత్‌బ్రష్‌ను తీసుకొచ్చింది.

‘కెమెరాజెట్‌’ పేరుతో రూపొందించిన ఈ పరికరంలో కృత్రిమ మేధ, అధునాతన కెమెరా సాంకేతికతలను ఉపయోగించారు. బ్రష్‌ హెడ్‌లోని సూక్ష్మ కెమెరా దంతాల మధ్య ఖాళీలను గుర్తిస్తూ.. ఎక్కడ ఎక్కువ శుభ్రత అవసరమో గమనిస్తుంది. ఆ ప్రాంతాలను గుర్తించిన వెంటనే అక్కడికి మౌత్‌వాష్‌ ద్రవాన్ని తగిన ఒత్తిడితో పంపేలా దీనిని రూపొందించారు.

ఈ ఏఐ వ్యవస్థకు సుమారు 4.7 లక్షల దంత చిత్రాలతో శిక్షణ ఇచ్చినట్లు సంస్థ పేర్కొంది. దంతాల ఆకృతి, పళ్ల మధ్య ఖాళీలు, బ్రషింగ్‌ సమయంలో శుభ్రం చేయాల్సిన ప్రాంతాలను గుర్తించడంలో ఇది సహాయపడుతుంది.

బ్రషింగ్‌తో పాటు ఫ్లాసింగ్‌ ప్రక్రియనూ ఒకే సమయంలో నిర్వహించేలా పరికరాన్ని రూపొందించడం దీని ప్రత్యేకతగా చెబుతున్నారు. పళ్ల మధ్య చిక్కుకున్న ఆహార వ్యర్థాలు, ప్లాక్‌ వంటి వాటిని తొలగించడంలో ఇది ఉపయోగపడేలా డిజైన్‌ చేశారు.

సాధారణంగా చాలామంది బ్రషింగ్‌ చేసిన తర్వాత ఫ్లాసింగ్‌ను మర్చిపోతుంటారు. అలాంటి వారికి ఒకే పరికరంలో అదనపు శుభ్రత ప్రక్రియలను అందించడం సమయాన్ని ఆదా చేయడమే కాకుండా నోటి పరిశుభ్రతపై మరింత శ్రద్ధ పెట్టేలా చేయొచ్చని భావిస్తున్నారు.

అయితే టూత్‌బ్రష్‌ ఏఐ ఆధారితమైనదే అయినా.. ఇది దంత వైద్యుడికి ప్రత్యామ్నాయం కాదు. చిగుళ్ల సమస్యలు, పిప్పిపళ్లు, తీవ్రమైన ప్లాక్‌ లేదా ఇతర దంత సమస్యలు ఉన్నవారు తప్పనిసరిగా దంత వైద్యుడిని సంప్రదించాలి.

ఈ స్మార్ట్‌ టూత్‌బ్రష్‌ ధరను 499 డాలర్లుగా నిర్ణయించారు. భారత కరెన్సీలో సుమారు రూ.47 వేల వరకు ఉండే ఈ పరికరం ప్రస్తుతం నోటి ఆరోగ్య సంరక్షణలో సాంకేతికత ఎంతగా మార్పులు తీసుకొస్తుందో చూపించే మరో ఉదాహరణగా నిలుస్తోంది.