నెలకు రూ.2 లక్షల జీతం.. అయినా కెరీర్‌కు డేంజర్‌!

నెలకు రూ.2 లక్షల ఆదాయం అంటే చాలా మందికి మంచి ఆర్థిక భద్రత. కుటుంబ అవసరాలు తీర్చుకోవడంతో పాటు సౌకర్యవంతమైన జీవితం గడిపేందుకు ఈ ఆదాయం తోడ్పడుతుంది. అయితే ఇదే సౌకర్యం కొన్నిసార్లు ఉద్యోగి కెరీర్‌ ఎదుగుదలకు అడ్డంకిగా మారొచ్చని బెంగళూరుకు చెందిన టెక్‌ ప్రొఫెషనల్‌ శశాంక్‌ దీక్షిత్‌ చేసిన సోషల్‌ మీడియా పోస్ట్‌ చర్చకు దారితీసింది.

ఆయన అభిప్రాయం ప్రకారం.. సమస్య రూ.2 లక్షల జీతం ఎక్కువగా ఉండటంలో లేదు. ఆ జీతం ‘ఇక ఇంత చాలు’ అనే భావనను కలిగించడంలోనే అసలు ప్రమాదం ఉంది. ఉద్యోగం మారితే జీతం తగ్గొచ్చు, కొత్త రంగంలోకి వెళ్తే అనిశ్చితి ఎదురవొచ్చు, సొంతంగా ఏదైనా ప్రారంభిస్తే ఆదాయం కొంతకాలం లేకపోవచ్చు. ఇలాంటి భయాలు ఉద్యోగిని ప్రస్తుత పరిస్థితికే పరిమితం చేయవచ్చని ఆయన చెబుతున్నారు.

మంచి జీతంతో మంచి జీవనశైలి అలవాటవుతుంది. ఆ తర్వాత ఇంటి అద్దె, రుణాలు, వాహనం, కుటుంబ ఖర్చులు, ఇతర ఆర్థిక బాధ్యతలు పెరుగుతాయి. దీంతో ఉద్యోగం మార్చడం లేదా కొంతకాలం ఆదాయం లేకుండా కొత్త అవకాశాన్ని ప్రయత్నించడం కష్టంగా మారుతుంది.

ఒకప్పుడు కలలుగా కనిపించిన స్టార్టప్‌, కొత్త కెరీర్‌, ఉన్నత విద్య, కొత్త నైపుణ్యాలు నేర్చుకోవడం వంటి విషయాలను ‘తర్వాత చూద్దాం’ అంటూ వాయిదా వేస్తూ పోయే అవకాశం ఉంటుంది. చివరకు ఉద్యోగం నచ్చకపోయినా.. దాన్ని వదిలే పరిస్థితి లేకుండా పోవచ్చు.

సోషల్‌ మీడియాలో కొందరు ఈ అభిప్రాయానికి మద్దతు ఇవ్వగా.. మరికొందరు విభేదించారు. రూ.2 లక్షల జీతం అనేది వ్యక్తిగత ఆర్థిక పరిస్థితులపై ఆధారపడి ఉంటుందని, దాన్ని స్వతహాగా ప్రమాదకరంగా చూడటం సరికాదని పలువురు పేర్కొన్నారు.

అసలు సమస్య ఆదాయం ఎంత అన్నదానికంటే.. ఆదాయం పెరిగిన తర్వాత మన ఖర్చులు ఎంత పెరుగుతున్నాయి? పొదుపు ఎంత చేస్తున్నాం? కొత్త నైపుణ్యాలపై ఎంత పెట్టుబడి పెడుతున్నాం? అనేదేనని నెటిజన్లు అభిప్రాయపడుతున్నారు.

అంటే.. ఎక్కువ జీతం ప్రమాదం కాదు. ఆ జీతానికి అలవాటుపడి ఎదుగుదలను ఆపేయడమే అసలు ప్రమాదం అన్నది ఈ చర్చ సారాంశం.