పవన్‌ ప్రతి అడుగూ పదిమందికి మేలు చేయాలనే తపనతోనే: చిరంజీవి

వన్‌ కల్యాణ్‌ ప్రజలకు మేలు చేయాలనే తపనతో ప్రతి అడుగు వేస్తారని అగ్రహీరో చిరంజీవి అన్నారు. చిన్నప్పటి నుంచే ఆయనలో ప్రజలకు సేవ చేయాలనే బాధ్యతాయుతమైన ఆలోచనను తాను గమనించానని తెలిపారు. పవన్‌ కల్యాణ్‌ పుట్టినరోజు సందర్భంగా సామాజిక మాధ్యమాల వేదికగా ఆయనకు చిరంజీవి హృదయపూర్వక శుభాకాంక్షలు తెలిపారు.

తనను ఎన్నుకున్న పిఠాపురం ప్రజలకు పవన్‌ కేవలం ప్రజా ప్రతినిధిగా కాకుండా కుటుంబ సభ్యుడిలా అండగా నిలుస్తున్నారని చిరంజీవి పేర్కొన్నారు. తాను చేసే ప్రతి పనిలో పూర్తిగా నిమగ్నమవుతూ.. తన ప్రతి అడుగు పదిమందికి ఉపయోగపడేలా వేస్తారని కొనియాడారు.

గ్రామాల అభివృద్ధి, గిరిజన ప్రాంతాల అభ్యున్నతి, పర్యావరణ పరిరక్షణతో పాటు ప్రజలకు అవసరమైన మౌలిక వసతుల కల్పన కోసం పవన్‌ అంకితభావంతో పనిచేస్తున్నారని చిరంజీవి తెలిపారు. పాలనలో తనదైన ముద్ర వేస్తున్నారని ప్రశంసించారు. ఎన్నో ఏళ్లుగా పరిష్కారం కాని సమస్యలకు శాశ్వత పరిష్కారాలు చూపడంతో పాటు మారుమూల ప్రాంతాలకు కూడా అభివృద్ధిని తీసుకెళ్లే ప్రయత్నం చేస్తున్నారని అన్నారు.

ప్రజల కష్టాలను తన కష్టాలుగా భావించే పవన్‌ కల్యాణ్‌ ప్రతి అడుగులోనూ విజయం సాధించాలని చిరంజీవి ఆకాంక్షించారు. తమ కుటుంబంపై పవన్‌ ఎంత ప్రేమ చూపిస్తారో.. తనను నమ్మిన ప్రజలపైనా అంతే ప్రేమను చూపిస్తారని పేర్కొన్నారు.

చిరంజీవి చేసిన వ్యాఖ్యలకు పవన్‌ కల్యాణ్‌ స్పందించారు. తనపై అన్నయ్య చూపుతున్న ప్రేమ, ఆప్యాయతలకు ధన్యవాదాలు తెలిపారు. చిన్నప్పటి నుంచి చిరంజీవి అందించిన మద్దతు, తనపై ఉంచిన నమ్మకం జీవితంలో ఎంతో ప్రత్యేకమైనవని పేర్కొన్నారు.

‘తండ్రి స్థానంలో ఉండి నాకు మార్గనిర్దేశనం చేసిన మీరు.. నా జీవితంలో మొట్టమొదటి హీరో’ అంటూ చిరంజీవిపై తన అభిమానాన్ని పవన్‌ కల్యాణ్‌ చాటుకున్నారు.