ఎన్‌సీఎల్‌టీకి అయిదుగురు సభ్యుల బెంచ్‌ ఏర్పాటు అధికారం లేదు: సుభాశ్‌ చంద్ర

ఎస్సెల్‌ గ్రూప్‌ ఛైర్మన్‌ సుభాశ్‌ చంద్ర వ్యక్తిగత దివాలా కేసులో నేషనల్‌ కంపెనీ లా ట్రైబ్యునల్‌ (ఎన్‌సీఎల్‌టీ) ఏర్పాటు చేసిన అయిదుగురు సభ్యుల ధర్మాసనంపై అభ్యంతరాలు వ్యక్తమయ్యాయి. తన కేసులో నిర్ణయం తీసుకునేందుకు ఈ విధంగా పెద్ద బెంచ్‌ను ఏర్పాటు చేసే అధికారం ఎన్‌సీఎల్‌టీకి లేదని చంద్ర తరఫు న్యాయవాదులు వాదించారు.

ఈ అంశంపై నేషనల్‌ కంపెనీ లా అప్పిలేట్‌ ట్రైబ్యునల్‌ (ఎన్‌సీఎల్‌ఏటీ)లో విచారణ సందర్భంగా సీనియర్‌ న్యాయవాది సస్మిత్‌ పాత్ర వాదనలు వినిపించారు. అయిదుగురు సభ్యులతో ధర్మాసనాన్ని ఏర్పాటు చేయడానికి ఎన్‌సీఎల్‌టీకి చట్టపరమైన అధికారం లేదని ఆయన పేర్కొన్నారు. ట్రైబ్యునల్‌ ఇచ్చిన ఆదేశాలు లోపభూయిష్టంగా ఉన్నాయని అభిప్రాయపడ్డారు.

రుణదాతలు సుభాశ్‌ చంద్రపై సుమారు రూ.22,006 కోట్ల క్లెయిమ్‌ చేసినట్లు కేసు వివరాల్లో ఉంది. అయితే ఈ మొత్తానికి బదులుగా రూ.6.5 కోట్ల చెల్లింపుతో సెటిల్‌మెంట్‌ చేసుకునేందుకు ఎన్‌సీఎల్‌టీ మూడో సభ్యుడు నీలేశ్‌ షా అనుమతిస్తూ ఆదేశాలు ఇచ్చారు. ఈ ఆదేశాలపై అయిదుగురు సభ్యులతో కూడిన ఎన్‌సీఎల్‌టీ ధర్మాసనం స్టే విధించింది.

ఈ స్టే ఉత్తర్వులపైనే చంద్ర తరఫు న్యాయవాది ప్రశ్నలు లేవనెత్తారు. అయిదుగురు సభ్యుల ధర్మాసనం ఏ అధికారంతో స్టే ఉత్తర్వులు జారీ చేసిందని ప్రశ్నించారు. అలాగే ఆ ధర్మాసనం ఎప్పుడు సమావేశమైందని, ఒకే ఆదేశం ద్వారా బెంచ్‌ను ఏర్పాటు చేయడానికి ఎలాంటి ప్రక్రియను అనుసరించారో స్పష్టం చేయాలని కోరారు.

మరోవైపు రుణదాతల తరఫున సొలిసిటర్‌ జనరల్‌ తుషార్‌ మెహతా వాదనలు వినిపించారు. మూడో సభ్యుడి ఆదేశాలకు వ్యతిరేకంగా దాఖలైన పిటిషన్‌ను తిరిగి పరిశీలించే అవకాశం ఉంచుతూ కేసును పరిష్కరించవచ్చని పేర్కొన్నారు. ఈ వ్యవహారంలో అసాధారణ పరిస్థితులు నెలకొన్నాయని, సభ్యుల మధ్య పరస్పర విరుద్ధ అభిప్రాయాలు ఉన్న నేపథ్యంలో పెద్ద బెంచ్‌ ద్వారా కేసును పరిశీలించడం సముచితమని ఆయన వాదించారు.

దీంతో సుభాశ్‌ చంద్ర వ్యక్తిగత దివాలా కేసులో ఎన్‌సీఎల్‌టీ ధర్మాసనం ఏర్పాటు, స్టే ఉత్తర్వుల చట్టబద్ధతతో పాటు రుణదాతల క్లెయిమ్‌లు, సెటిల్‌మెంట్‌ ప్రతిపాదన వంటి అంశాలు కీలకంగా మారాయి.