కళలు లేకపోతే నా జీవితమే లేదు: అనంతిక

‘మ్యాడ్‌’, ‘8 వసంతాలు’ చిత్రాలతో తెలుగు ప్రేక్షకులకు చేరువైన మలయాళ భామ అనంతిక సనీల్‌కుమార్‌.. తనకంటూ ప్రత్యేక గుర్తింపు తెచ్చుకుంటోంది. కథకు ప్రాధాన్యమున్న సినిమాలను ఎంచుకుంటూ ముందుకు సాగుతున్న ఆమె.. ప్రస్తుతం ‘రోమాంచకం’తో ప్రేక్షకుల ముందుకు రాబోతోంది. సుమంత్‌ ప్రభాస్‌ కథానాయకుడిగా నటించిన ఈ చిత్రానికి వేణుగోపాల్‌ రెడ్డి దర్శకత్వం వహించారు. ప్రణయ్‌రెడ్డి వంగా నిర్మించగా.. ప్రముఖ దర్శకుడు సందీప్‌రెడ్డి వంగా సమర్పిస్తున్నారు. ఈ సినిమా సెప్టెంబరు 3న ప్రేక్షకుల ముందుకు రానుంది. ఈ సందర్భంగా అనంతిక సోమవారం హైదరాబాద్‌లో విలేకర్లతో ముచ్చటించారు.

సినిమా ఎంపిక విషయంలో కథకే తాను ఎక్కువ ప్రాధాన్యమిస్తానని అనంతిక తెలిపారు. ‘‘అందరికంటే.. అన్నిటికంటే సినిమాకి కథే ముఖ్యమని నమ్ముతాను. అందుకే కథను దృష్టిలో ఉంచుకునే సినిమాల ఎంపికపై నిర్ణయాలు తీసుకుంటా. ‘8 వసంతాలు’ తర్వాత చాలా కథలు విన్నాను. వాటిలో ‘రోమాంచకం’ కథ నాకు బాగా నచ్చింది. నచ్చడం మాత్రమే కాదు.. ఎప్పట్నుంచో ఇలాంటి ఓ కథలో భాగం కావాలని అనుకుంటున్నా. ఆ కోరిక ఈ సినిమాతో నెరవేరింది’’ అని చెప్పారు.

‘రోమాంచకం’లో ప్రేమ, హాస్యం, ఉత్కంఠ ప్రధానంగా ఉంటాయని అనంతిక వెల్లడించారు. ‘‘ప్రేమ, హాస్యం, ఉత్కంఠ అనేది ఈ సినిమాకి ఉపశీర్షిక. అందుకు తగ్గట్టే ఈ మూడు భావోద్వేగాల చుట్టూ కథ సాగుతుంది. ఇందులో నాకు ఉత్కంఠ కోణం బాగా నచ్చింది. గతంలో నేను చేసిన పాత్రలకు పూర్తి భిన్నంగా ఈ సినిమాలో కనిపిస్తా. ప్రేమకథా చిత్రమే అయినప్పటికీ కుటుంబ ప్రేక్షకులు సైతం ఆస్వాదించేలా సినిమా ఉంటుంది’’ అని పేర్కొన్నారు.

తనకు చిన్నప్పటి నుంచే వివిధ కళలపై ఆసక్తి ఉందని అనంతిక తెలిపారు. ‘‘ఎల్‌.కె.జి నుంచే ఏదో ఒక కళారూపంలో శిక్షణ తీసుకుంటున్నా. నృత్యం, యుద్ధ విద్యలతో పాటు చిత్రలేఖనం వంటి ఎన్నో కళలు నేర్చుకున్నా. ఇంకా నేర్చుకోవాల్సినవి చాలా ఉన్నాయి. కళలు లేకపోతే నా జీవితమే లేదేమో అనిపిస్తుంది. నేను నేర్చుకున్న ప్రతి కళ ఏదో ఒక రూపంలో నా సినిమాలకు ఉపయోగపడుతూనే ఉంది’’ అని ఆమె చెప్పారు.

నటిగా వైవిధ్యమైన పాత్రలు చేయాలనే ఆసక్తి తనకు ఉందని అనంతిక అన్నారు. ‘‘నటిగా కొత్త తరహా పాత్రలు, కథలు చేయాలని ఉంది. నృత్య ప్రధానమైన కథలు వచ్చినా చేయడానికి సిద్ధమే. ఏ పాత్రలో నటించినా ముందుగా నాకు సంతృప్తి కలగాలి. అప్పుడే ఆ పాత్ర ద్వారా ప్రేక్షకులను కూడా మెప్పించగలనని భావిస్తా’’ అని తెలిపారు.