యాప్‌లో బుకింగ్‌.. ప్రయాణికులకు షాక్‌ మీద షాక్‌

ఆన్‌లైన్‌ యాప్‌ల ద్వారా వాహనాలను బుక్‌ చేసుకునే ప్రయాణికులకు సౌకర్యంతో పాటు కొత్త సమస్యలు ఎదురవుతున్నాయి. వర్షం, ట్రాఫిక్‌, రాత్రి వేళలు, పండగలు, సెలవులు వంటి సందర్భాల్లో ఛార్జీలు ఒక్కసారిగా పెరుగుతున్నాయనే ఫిర్యాదులు వినిపిస్తున్నాయి. టూవీలర్‌ ట్యాక్సీలు, ఆటోలు, క్యాబ్‌లతో పాటు అంతర్రాష్ట్ర క్యాబ్‌ సేవలు, ప్రైవేట్‌ బస్సుల్లోనూ అదనపు వసూళ్లపై ప్రయాణికులు ఆందోళన వ్యక్తం చేస్తున్నారు.

ఒకే ప్రాంతానికి వెళ్లేందుకు ఒకే సమయంలో వేర్వేరు యాప్‌లలో వేర్వేరు ఛార్జీలు కనిపించడం, బుకింగ్‌ పూర్తయిన తర్వాత డ్రైవర్‌ ఫోన్‌ చేసి గమ్యస్థానం తెలుసుకోవడం వంటి ఘటనలు ప్రయాణికులకు ఇబ్బందిగా మారుతున్నాయి. దూరం తక్కువగా ఉందని ట్రిప్‌ను తిరస్కరించడం, అదనంగా డబ్బులు లేదా టిప్‌ కోరడం, బుకింగ్‌ అంగీకరించిన తర్వాత డ్రైవర్‌ లేదా ప్రయాణికుడి వైపు నుంచి క్యాన్సిల్‌ చేయాల్సిన పరిస్థితులు ఏర్పడుతున్నాయి.

అంతర్రాష్ట్ర ప్రయాణాల్లో పర్మిట్‌ పేరుతో అదనపు మొత్తాలను వసూలు చేస్తున్నారనే ఆరోపణలు కూడా ఉన్నాయి. కొందరు డ్రైవర్లు ఒక ట్రిప్‌ కోసం ప్రయాణికుల నుంచి వారం రోజుల పర్మిట్‌ ఖర్చును కూడా వసూలు చేస్తున్నారని చెబుతున్నారు. దీనికి తోడు టోల్‌ ఛార్జీలు కూడా ప్రయాణికులపై పడుతున్నాయి. కొన్ని సందర్భాల్లో టోల్‌ రహిత మార్గాల్లో వాహనాలను మళ్లించినా.. యాప్‌లో చూపిస్తున్న ఛార్జీనే చెల్లించాల్సి వస్తోందని ప్రయాణికులు పేర్కొంటున్నారు.

పండగలు, సెలవులు, రద్దీ సమయాల్లో ప్రైవేట్‌ బస్సుల ఛార్జీలు కూడా పెరుగుతున్నాయని ఫిర్యాదులు ఉన్నాయి. ప్రయాణికుల డిమాండ్‌ను బట్టి కొన్ని సందర్భాల్లో సాధారణ ఛార్జీల కంటే 50 శాతం నుంచి 100 శాతం వరకు అదనంగా వసూలు చేస్తున్నారనే ఆరోపణలు వస్తున్నాయి.

యాప్‌ ఆధారిత రవాణా సేవలు విస్తరిస్తున్న నేపథ్యంలో ఛార్జీల పారదర్శకత, డ్రైవర్ల ప్రవర్తన, బుకింగ్‌ రద్దు, అదనపు వసూళ్లు, ప్రయాణికుల భద్రత వంటి అంశాలపై స్పష్టమైన మార్గదర్శకాలు అవసరమని ప్రయాణికులు కోరుతున్నారు. అగ్రిగేటర్‌ సంస్థలు, డ్రైవర్లు, ప్రైవేట్‌ రవాణా ఆపరేటర్లపై పర్యవేక్షణను పెంచడంతో పాటు ఫిర్యాదుల పరిష్కారానికి సమర్థవంతమైన వ్యవస్థ ఉండాలని వారు అభిప్రాయపడుతున్నారు.