బీసీసీఐ హెచ్చరిక.. హనీట్రాప్‌లపై క్రికెటర్లకు అలర్ట్

ప్రస్తుతం కొనసాగుతున్న ఐపీఎల్ సీజన్‌లో ప్రోటోకాల్ ఉల్లంఘనలు పెరుగుతున్న నేపథ్యంలో భారత క్రికెట్ నియంత్రణ మండలి (బీసీసీఐ) తీవ్రంగా స్పందించింది. ఆటగాళ్లు, కోచింగ్ స్టాఫ్ మరియు జట్టు అధికారులు హనీట్రాప్‌ల వంటి ప్రమాదకర ఉచ్చుల్లో పడకుండా అత్యంత అప్రమత్తంగా ఉండాలని స్పష్టం చేస్తూ అన్ని ఫ్రాంచైజీలకు అధికారిక నోటీసులు జారీ చేసింది.

బీసీసీఐ కార్యదర్శి దేవ్‌జిత్ సైకియా ఈ మేరకు జట్లకు ప్రత్యేకంగా హెచ్చరికలు పంపారు. “ఈ సీజన్‌లో కొందరు ఆటగాళ్లు, సహాయక సిబ్బంది మరియు జట్టు అధికారులు నిబంధనలను ఉల్లంఘించిన ఘటనలు మా దృష్టికి వచ్చాయి. వీటిని నియంత్రించకపోతే టోర్నమెంట్ ప్రతిష్ఠకు, ఫ్రాంచైజీలకు, అలాగే బీసీసీఐకి చెడ్డ పేరు వస్తుంది” అని ఆయన పేర్కొన్నారు.

దీంతో బీసీసీఐ కొత్త భద్రతా మార్గదర్శకాలను కూడా అమలు చేసింది. ఆటగాళ్ల అనుమతి లేకుండా లేదా టీమ్ మేనేజర్ ఆమోదం లేకుండా ఎవ్వరినీ వారి హోటల్ గదుల్లోకి అనుమతించకూడదని స్పష్టం చేసింది. అలాగే ఆటగాళ్లను కలిసే ప్రతి అతిథి వివరాలను తప్పనిసరిగా నమోదు చేయాలని ఆదేశించింది. అవసరమైతే ఆకస్మిక తనిఖీలు కూడా నిర్వహించనున్నట్లు తెలిపింది.

నిబంధనలు ఉల్లంఘించిన వారిపై షోకాజ్ నోటీసులు, భారీ జరిమానాలు, సస్పెన్షన్ లేదా డిస్‌క్వాలిఫికేషన్ వంటి కఠిన చర్యలు తీసుకుంటామని బీసీసీఐ హెచ్చరించింది. అంతేకాకుండా నిషేధిత పదార్థాల వినియోగం లేదా భద్రతా నిబంధనల ఉల్లంఘన జరిగితే పోలీసు కేసులు కూడా నమోదు చేయబడతాయని స్పష్టం చేసింది.