సోలార్‌ పవర్‌లో కెరీర్‌ అవకాశాలు… 2030 నాటికి లక్షల ఉద్యోగాలు..!

పర్యావరణానికి అనుకూలమైన విద్యుత్ ఉత్పత్తి విధానాల్లో సౌరశక్తి (Solar Power) అత్యంత వేగంగా అభివృద్ధి చెందుతున్న రంగంగా మారుతోంది. ప్రపంచవ్యాప్తంగా విద్యుత్ ఉత్పత్తిలో కాలుష్యం, అధిక వ్యయాలు వంటి సమస్యలకు పరిష్కారంగా సోలార్ పవర్ ప్రాధాన్యం పెరుగుతోంది. ఈ నేపథ్యంలో భారతదేశంలో కూడా సౌర విద్యుత్ రంగం విస్తరిస్తూ 2030 నాటికి సుమారు పది లక్షల ఉద్యోగాలను సృష్టించే అవకాశం ఉందని నిపుణులు చెబుతున్నారు.

ప్రభుత్వ ప్రోత్సాహకాలు, సబ్సిడీలు, పర్యావరణ హిత విధానాలు కారణంగా గృహాలు, పరిశ్రమలు, వ్యవసాయ రంగంలో సౌర విద్యుత్ వినియోగం వేగంగా పెరుగుతోంది. దీంతో ఈ రంగంలో ఇంజినీరింగ్, టెక్నికల్, సేల్స్, మేనేజ్‌మెంట్ వంటి అనేక విభాగాల్లో యువతకు మంచి కెరీర్ అవకాశాలు ఏర్పడుతున్నాయి.

సోలార్ ఎనర్జీ అంటే ఏమిటి?

సూర్య కాంతిని విద్యుత్తుగా మార్పిడి చేసే విధానాన్ని సోలార్ ఎనర్జీ అంటారు. సాధారణంగా సిలికాన్ వంటి సెమీ కండక్టర్ పదార్థాలతో తయారైన ఫోటో వోల్టాయిక్ (PV) సెల్స్ ద్వారా సూర్యకాంతి విద్యుత్తుగా మారుతుంది. సోలార్ ప్లాంట్ల నిర్మాణం నుంచి ప్యానెల్ ఇన్‌స్టాలేషన్, నిర్వహణ, పంపిణీ, మార్కెటింగ్ వరకు అనేక దశల్లో ఉద్యోగ అవకాశాలు ఉన్నాయి.

రాష్ట్రాల్లో పెరుగుతున్న సోలార్ ప్రాజెక్టులు

భారతదేశంలో మహారాష్ట్ర, రాజస్థాన్, గుజరాత్, కర్ణాటక, తమిళనాడు రాష్ట్రాల్లో సోలార్ ప్లాంట్లు ఎక్కువగా ఉన్నాయి. ఆంధ్రప్రదేశ్ కూడా ఈ రంగంలో ముందుకు సాగుతోంది.

కర్నూలులో 1000 మెగావాట్ల అల్ట్రా మెగా సోలార్ పార్క్ ఇప్పటికే స్థాపించారు.

అనంతపురంలో రెన్యూ పవర్ సంస్థ సౌర, పవన హైబ్రిడ్ పవర్ ప్లాంట్‌ను దశల వారీగా నిర్మిస్తోంది.

సోలార్ రంగంలో ఉద్యోగాలు

సోలార్ పరిశ్రమలో అనేక విభాగాల్లో ఉద్యోగాలు లభిస్తాయి.

డిజైన్ విభాగం:

సోలార్ డిజైన్ ఇంజినీర్

స్ట్రక్చరల్ డిజైనర్

ప్రాజెక్ట్ ఇంజినీర్

ఇన్‌స్టాలేషన్ & మెయింటెనెన్స్:

సైట్ సూపర్‌వైజర్

సోలార్ టెక్నీషియన్

ఎలక్ట్రీషియన్

సప్లై & లాజిస్టిక్స్:

లాజిస్టిక్స్ కోఆర్డినేటర్

ప్రొక్యూర్‌మెంట్ ఆఫీసర్

వేర్‌హౌస్ మేనేజర్

సేల్స్ & బిజినెస్ డెవలప్‌మెంట్:

సేల్స్ కన్సల్టెంట్

ఏరియా సేల్స్ మేనేజర్

బిజినెస్ డెవలప్‌మెంట్ మేనేజర్

అవసరమైన విద్యార్హతలు

సోలార్ పరిశ్రమలో ప్రవేశించేందుకు వివిధ విద్యార్హతలతో అవకాశాలు ఉన్నాయి.

ఐటీఐ, డిప్లొమా – ఇన్‌స్టాలేషన్, టెక్నీషియన్ ఉద్యోగాలకు

బీటెక్ (EEE, ECE, Civil) – డిజైన్, ప్రాజెక్ట్ ఇంజినీరింగ్

ఎంబీఏ, బీబీఏ – సేల్స్, మేనేజ్‌మెంట్ విభాగాలకు

అవసరమైన నైపుణ్యాలు

ఈ రంగంలో రాణించాలంటే కొన్ని ముఖ్యమైన టెక్నికల్ స్కిల్స్ అవసరం.

AutoCAD పరిజ్ఞానం

Photovoltaic Systems అవగాహన

Helioscope Software అనుభవం

MS Office పని చేయగల సామర్థ్యం

ప్రముఖ సంస్థలు

సోలార్ రంగంలో అనేక పెద్ద కంపెనీలు కార్యకలాపాలు నిర్వహిస్తున్నాయి. వాటిలో ముఖ్యమైనవి:

Adani Renewables

Tata Power Solar

Reliance New Energy

NTPC Green

ReNew Power

Azure Power

ప్రస్తుతం భారతదేశంలో సుమారు 140 గిగావాట్ల సోలార్ పవర్ ఉత్పత్తి జరుగుతోంది. దీన్ని 2031 నాటికి 500 గిగావాట్లకు పెంచడం కేంద్ర ప్రభుత్వ లక్ష్యం. ఈ లక్ష్యంతో కొత్త సోలార్ ప్రాజెక్టులు ప్రారంభమవుతున్నందున భవిష్యత్తులో ఈ రంగంలో యువతకు విస్తృతంగా ఉద్యోగ అవకాశాలు లభించే అవకాశాలు ఉన్నాయి.