హైదరాబాద్ ఔటర్ రింగ్ రోడ్ లోపల వరకే సిటీ బస్సుల పరిమితి

హైదరాబాద్ నగరంలో ఆర్టీసీ సేవల నిర్వహణలో పెద్ద మార్పులకు రంగం సిద్ధమవుతోంది. ఖర్చులను తగ్గించుకోవాలనే ఉద్దేశంతో ఆర్టీసీ కొత్త ప్రణాళికను రూపొందిస్తోంది.ఈ ప్రణాళిక ప్రకారం, ఇకపై హైదరాబాద్ ఔటర్ రింగ్ రోడ్ పరిధిలోనే సిటీ బస్సులు నడపాలని భావిస్తున్నారు. ప్రస్తుతం నగరానికి 30–50 కిలోమీటర్ల దూర ప్రాంతాలకు వెళ్లే సిటీ బస్సులను సంబంధిత జిల్లా డిపోలకు బదిలీ చేయాలని యోచిస్తున్నారు.

దీనివల్ల నగర డిపోల్లో పనిచేస్తున్న సిబ్బందిపై వచ్చే అధిక అద్దె భత్యం (HRA), నగర పరిహార భత్యం (CCA) వంటి ఖర్చులను తగ్గించుకోవచ్చని అధికారులు భావిస్తున్నారు. ఇదే సమయంలో డీజిల్ బస్సుల్లో పనిచేస్తున్న సిబ్బందిని (కండక్టర్లను మినహాయించి) జిల్లా డిపోలకు తరలించే అవకాశాలు కనిపిస్తున్నాయి.

మరోవైపు, భవిష్యత్తులో హైదరాబాద్ నగరంలో ఎక్కువగా ప్రైవేట్ సంస్థల ఆధ్వర్యంలో ఎలక్ట్రిక్ బస్సులను నడపాలని ప్రభుత్వం ఆలోచిస్తోంది. దీంతో ఆర్టీసీ పాత్ర నగరంలో తగ్గే అవకాశముంది. అయితే, ఈ నిర్ణయంపై ఆర్టీసీ కార్మిక సంఘాలు తీవ్రంగా స్పందిస్తున్నాయి. ప్రైవేట్ సంస్థలకు ఎలక్ట్రిక్ బస్సులను అప్పగించడం, సిబ్బందిని బదిలీ చేయడం వంటి అంశాలపై వారు నిరసనలు వ్యక్తం చేస్తున్నారు. మొత్తంగా ఈ మార్పులు ఆర్టీసీ ఆర్థిక పరిస్థితిని మెరుగుపరచడానికా? లేక ఉద్యోగులపై భారం పెంచడానికా? అన్నది రాబోయే రోజుల్లో స్పష్టమవుతుంది.