జిల్లాల మార్పులపై క్లారిటీ ఇచ్చిన సీఎం

తెలంగాణ ముఖ్యమంత్రి రేవంత్ రెడ్డి కీలక ప్రకటనలు చేశారు. జిల్లాలు, రెవెన్యూ డివిజన్లు, మండలాల సరిహద్దులను 2027 మార్చి 31 వరకు మార్చవద్దని కేంద్రం గడువు విధించిందని తెలిపారు. ఆ తర్వాత జ్యుడిషియల్ కమిషన్ ఏర్పాటు చేసి సమస్యలను పరిష్కరించే ప్రయత్నం చేస్తామని వెల్లడించారు.‘ప్రజాపాలన–ప్రగతి ప్రణాళిక’ కార్యక్రమంలో భాగంగా ఆదిలాబాద్ జిల్లా పిప్పిరిలో జరిగిన సభలో ఆయన మాట్లాడారు. భట్టి విక్రమార్క ప్రారంభించిన పీపుల్స్ మార్చ్ పాదయాత్రను పురస్కరించుకొని ఈ కార్యక్రమం నిర్వహించారు.

త్వరలో ప్రాణహిత-చేవెళ్ల ప్రాజెక్టు పనులను తుమ్మిడిహెట్టి వద్ద ప్రారంభిస్తామని సీఎం తెలిపారు. రాష్ట్ర అభివృద్ధి ఆగకుండా ఉండాలంటే రాజకీయ భేదాభిప్రాయాలు పరిమితంగా ఉండాలని సూచించారు.గత ప్రభుత్వంపై విమర్శలు చేస్తూ, ప్రతిపక్షాలకు మాట్లాడే అవకాశాలు ఇవ్వలేదని ఆరోపించారు. తమ ప్రభుత్వం మాత్రం అన్ని వర్గాల ప్రజలకు సంక్షేమ పథకాలను సమానంగా అమలు చేస్తోందన్నారు.
ఇందిరమ్మ ఇళ్ల పథకం కింద రాష్ట్రవ్యాప్తంగా 4.5 లక్షల ఇళ్లను మంజూరు చేసి, ఇప్పటికే రూ.5,400 కోట్లను లబ్ధిదారుల ఖాతాల్లో జమ చేసినట్లు తెలిపారు.

ఆదిలాబాద్ జిల్లా అభివృద్ధికి ప్రత్యేక చర్యలు తీసుకుంటున్నామని, రూ.1,239 కోట్ల వ్యయంతో పలు అభివృద్ధి పనులు ప్రారంభించామని చెప్పారు. జిల్లాలో విమానాశ్రయం, భారీ పారిశ్రామిక వాడ, విశ్వవిద్యాలయం ఏర్పాటుకు చర్యలు కొనసాగుతున్నాయని తెలిపారు.విద్యా రంగంలో భాగంగా ‘యంగ్ ఇండియా ఇంటిగ్రేటెడ్ స్కూల్స్’ స్థాపనకు శ్రీకారం చుట్టామని చెప్పారు. అభివృద్ధి కోసం భూసేకరణ ప్రక్రియ వేగంగా సాగుతోందని వివరించారు.

ఉమ్మడి ఆదిలాబాద్ జిల్లా వెనుకబడిన ప్రాంతమని, దాని అభివృద్ధికి ప్రత్యేక దృష్టి సారిస్తామని తెలిపారు. ప్రతి రెండు నెలలకు ఒకసారి జిల్లాను సందర్శిస్తానని హామీ ఇచ్చారు.అలాగే రాష్ట్రంలో జరుగుతున్న అభివృద్ధిని అడ్డుకునే శక్తులపై ప్రజలు అప్రమత్తంగా ఉండాలని కోరారు. గత ప్రభుత్వంలో భారీ అప్పులు చేశారని ఆరోపిస్తూ, ఒక్కొక్కటిగా సమస్యలను పరిష్కరిస్తున్నామని పేర్కొన్నారు.