కమిన్స్‌పై క్రికెట్ ఆస్ట్రేలియా కన్ను.. రూ.113 కోట్ల ఆఫర్ వార్తల్లో

సన్‌రైజర్స్ హైదరాబాద్ కెప్టెన్ ప్యాట్ కమిన్స్‌కు క్రికెట్ ప్రపంచంలో భారీ ఆఫర్ వచ్చినట్లు వార్తలు వెలుగులోకి వచ్చాయి. క్రికెట్ ఆస్ట్రేలియా అతనికి మూడేళ్ల కాలానికి రూ.113 కోట్లు (సుమారు 12 మిలియన్ డాలర్లు) విలువైన ప్రత్యేక ఒప్పందం కోసం ప్రయత్నిస్తున్నట్లు సమాచారం. ఈ డీల్ ద్వారా కమిన్స్‌ను ఆస్ట్రేలియా తరఫున మూడు ఫార్మాట్లలో కొనసాగించేలా ఒప్పందం చేసుకోవాలని చూస్తున్నట్లు కథనం వెల్లడించింది.

కమిన్స్‌తో పాటు ట్రావిస్ హెడ్, మార్నస్ లబుషేన్ వంటి స్టార్ ఆటగాళ్లను కూడా ఇలాంటి దీర్ఘకాలిక ఒప్పందాల్లో బంధించాలనే ఆలోచనలో ఉన్నట్లు తెలుస్తోంది. ఇదే సమయంలో ఒక ఐపీఎల్ ఫ్రాంచైజీ గ్లోబల్ టీ20 లీగ్స్‌లో తమ తరఫున ఆడేందుకు కమిన్స్‌కు 6.6 మిలియన్ డాలర్లు (దాదాపు రూ.62 కోట్లు) ఆఫర్ చేసినట్లు కూడా వార్తలు వస్తున్నాయి. ఈ నేపథ్యంలోనే క్రికెట్ ఆస్ట్రేలియా ముందుగానే కదిలినట్లు సమాచారం.

వెస్టిండీస్ ఆటగాళ్లు టీ20 లీగ్స్‌కి ప్రాధాన్యం ఇచ్చిన తర్వాత జాతీయ జట్టుకు ఎదురైన ఇబ్బందులను దృష్టిలో పెట్టుకుని, అలాంటి పరిస్థితి ఆస్ట్రేలియాకు రాకుండా ముందస్తు చర్యలు తీసుకుంటున్నట్లు విశ్లేషణలు ఉన్నాయి.

ఈ అంశంపై స్పందించిన క్రికెట్ ఆస్ట్రేలియా హెడ్ జేమ్స్ ఆల్సోప్, ఆటగాళ్లకు ఆర్థిక భద్రత కల్పించాల్సిన అవసరం ఉందని అన్నారు. “ఆస్ట్రేలియా కోసం అన్ని ఫార్మాట్లలో అద్భుతంగా ఆడిన ఆటగాళ్లకు మంచి పారితోషికం లభించాలి. మార్కెట్ డిమాండ్‌ ప్రకారం వారి విలువ పెరుగుతుంది. ప్యాట్ కమిన్స్, జోష్ హేజిల్‌వుడ్, ట్రావిస్ హెడ్ వంటి ఆటగాళ్లను అన్ని ఫార్మాట్లలో కొనసాగించడం మా ప్రాధాన్యత” అని ఆయన పేర్కొన్నారు.

అయితే ఈ భారీ డీల్‌పై అధికారికంగా ఎలాంటి ప్రకటన చేయలేదని కూడా ఆయన స్పష్టం చేశారు. మొత్తంగా కమిన్స్ భవిష్యత్తుపై ఈ వార్తలు క్రికెట్ వర్గాల్లో పెద్ద చర్చకు దారితీస్తున్నాయి.