గృహహింస ప్రభావం మహిళల ఆరోగ్యంపై తీవ్ర ప్రభావం.. ముందుగానే మెనోపాజ్‌ ముప్పు

గృహహింస, వేధింపులు మహిళల శారీరక, మానసిక ఆరోగ్యంపై దీర్ఘకాల ప్రభావం చూపుతాయని స్పెయిన్‌లోని గ్రెనడా విశ్వవిద్యాలయ పరిశోధకుల అధ్యయనం వెల్లడించింది. వేధింపులను ఎదుర్కొన్న మహిళల్లో మెనోపాజ్‌ లక్షణాలు సాధారణ మహిళల కంటే ఎక్కువగా కనిపిస్తున్నాయని పరిశోధకులు గుర్తించారు.

అధ్యయనం ప్రకారం.. గృహహింసకు గురైన మహిళల్లో రుతుక్రమం ముందుగానే ఆగిపోయే అవకాశం ఉందని, సాధారణ మహిళలతో పోలిస్తే సగటున 20 నెలల ముందే మెనోపాజ్‌ వచ్చే పరిస్థితులు ఉండొచ్చని తేలింది. దీని ప్రభావం మహిళల ఆరోగ్యంపై మధ్య వయసు దశలో కూడా కొనసాగుతుందని పరిశోధకులు పేర్కొన్నారు.

తీవ్రమైన మానసిక ఒత్తిడి కారణంగా శరీరంలోని హార్మోన్ల నియంత్రణ వ్యవస్థపై ప్రభావం పడుతుందని, జన్యువుల పనితీరులో కూడా మార్పులు సంభవించే అవకాశం ఉందని అధ్యయనం వివరించింది. దీని వల్ల అండాశయాల పనితీరు దెబ్బతిని అకాల అండాశయ వైఫల్యం వంటి సమస్యలు వచ్చే ప్రమాదం ఉందని హెచ్చరించింది.

మెనోపాజ్‌ సమయంలో మహిళల్లో కనిపించే సాధారణ లక్షణాలు వేధింపులకు గురైన వారిలో మరింత తీవ్రంగా ఉండొచ్చని పరిశోధకులు తెలిపారు. అకస్మాత్తుగా ముఖం, మెడ భాగాల్లో వేడి ఆవిర్లు రావడం, అధిక చెమటలు పట్టడం, నిద్రలేమి, ఆందోళన, నిరాశ, కుంగుబాటు వంటి సమస్యలు పెరిగే అవకాశం ఉందన్నారు.

అలాగే లైంగిక ఆరోగ్యం, మూత్రకోశ సంబంధిత సమస్యలు కూడా తీవ్రతరం కావచ్చని తెలిపారు. మెనోపాజ్‌ అనంతరం శారీరక, మానసిక, లైంగిక ఆరోగ్యంపై ప్రభావం పడి మహిళల జీవన నాణ్యత తగ్గే అవకాశం ఉందని పేర్కొన్నారు.

గృహహింస అనేది కేవలం కుటుంబ సమస్య మాత్రమే కాకుండా కీలకమైన ప్రజారోగ్య సమస్యగా చూడాల్సిన అవసరం ఉందని నిపుణులు సూచిస్తున్నారు. వేధింపుల ప్రభావాలు ఘటన జరిగిన కొన్ని సంవత్సరాలకే పరిమితం కాకుండా దశాబ్దాల పాటు కొనసాగవచ్చని అధ్యయనం పేర్కొంది.

ఇలాంటి సమస్యలను ఎదుర్కొంటున్న మహిళలకు గోప్యమైన వైద్య సహాయం అందించడం, మానసిక ఆరోగ్య పరిరక్షణకు కౌన్సెలింగ్‌ కల్పించడం, లైంగిక అంటువ్యాధులు, గర్భాశయ క్యాన్సర్‌ వంటి సమస్యలకు ముందస్తు పరీక్షలు నిర్వహించడం అవసరమని పరిశోధకులు సూచించారు.

మహిళల ఆరోగ్యాన్ని కాపాడేందుకు గృహహింస నివారణ, బాధితులకు సకాలంలో వైద్య, మానసిక సహాయం అందించడం అత్యంత ముఖ్యమని నిపుణులు అభిప్రాయపడుతున్నారు.