ఎన్టీఆర్–ప్రశాంత్ నీల్ కాంబినేషన్‌లో ‘డ్రాగన్’ మూవీ గ్లింప్స్ విడుదల

ఎన్టీఆర్ ‘డ్రాగన్’ అవతారంలో చెప్పిన డైలాగ్‌తో గ్లింప్స్ ప్రారంభమవుతూ సినిమాపై భారీ ఆసక్తిని రేపింది. “దేవుడు నాకొక గొప్ప వరం ఇచ్చాడు… ట్రిగ్గర్ నొక్కగానే మరిచిపోవడం” అంటూ ఆయన పాత్రలోని తీవ్రతను చూపించే మాటలు హైలైట్‌గా నిలిచాయి. “నిద్రపోయినప్పుడు నా కలలో నేను చంపినవాళ్ల ముఖాలు రావు, మిగిలివున్న శత్రువుల ముఖాలే కనపడతాయి. పొరపాటున కూడా నా కల్లోకి రావొద్దు” అనే డైలాగ్‌తో ఎన్టీఆర్ పాత్ర ఎంత రక్తపాతం, ఎంత శక్తివంతంగా ఉండబోతోందో స్పష్టమైంది.

ప్రశాంత్ నీల్ దర్శకత్వంలో రూపొందుతున్న ఈ భారీ ప్రాజెక్ట్ ‘డ్రాగన్’ గ్లింప్స్ ఎన్టీఆర్ పుట్టినరోజు సందర్భంగా విడుదలైంది. టైటిల్‌ను అధికారికంగా ప్రకటించడంతో పాటు సినిమా ప్రపంచాన్ని పరిచయం చేస్తూ గ్లింప్స్ ఆకట్టుకుంది. మైత్రీ మూవీ మేకర్స్, ఎన్టీఆర్ ఆర్ట్స్, టీ-సిరీస్ ఫిల్మ్స్ సంయుక్తంగా ఈ చిత్రాన్ని నిర్మిస్తున్నాయి. నిర్మాతలుగా నందమూరి కల్యాణ్ రామ్, నవీన్ ఎర్నేని, రవిశంకర్ యలమంచిలి, కొసరాజు హరికృష్ణ వ్యవహరిస్తున్నారు.

గ్లింప్స్‌లో చూపించిన కథా నేపథ్యం కూడా ప్రత్యేక ఆకర్షణగా నిలిచింది. బ్రిటిష్ వారు భారత్‌లో కాటన్, స్టీల్, స్పైసెస్ కోసం వచ్చారని, కానీ ఓపియమ్ పాపి అనే మొక్క కారణంగా 250 ఏళ్లు ఇక్కడే ఉండిపోయారని చెప్పే నరేషన్ సినిమాపై ఆసక్తిని మరింత పెంచింది. ఈ మొక్క హెరాయిన్ తయారీలో ఉపయోగపడుతుందని, కానీ అదే సమయంలో విలన్లను కూడా తయారు చేసిందని చూపించడం కథకు కొత్త కోణాన్ని ఇచ్చింది.

ఎన్టీఆర్ డ్రాగన్‌గా శక్తివంతమైన, రక్తపాతం సృష్టించే పాత్రలో కనిపించబోతున్నారని గ్లింప్స్ స్పష్టం చేసింది. ‘KGF’ మరియు ‘Salaar’ వంటి భారీ చిత్రాల తర్వాత ప్రశాంత్ నీల్ తెరకెక్కిస్తున్న ఈ సినిమా పాన్ ఇండియా స్థాయిలో భారీ అంచనాలను సృష్టిస్తోంది. సంగీతం బాధ్యతలను రవి బస్రూర్ నిర్వహిస్తున్నారు.

ఈ చిత్రం వచ్చే ఏడాది జూన్ 11న ప్రేక్షకుల ముందుకు రానుందని చిత్రబృందం ప్రకటించింది.