ప్రపంచ ఆర్థిక వ్యవస్థలో ‘టగ్‌ ఆఫ్‌ వార్‌’: IMF చీఫ్‌ జార్జివా

ప్రపంచ ఆర్థిక వ్యవస్థ ప్రస్తుతం పశ్చిమాసియా పరిణామాల ప్రతికూలతలు, కృత్రిమ మేధ (AI) రంగంలో పెరుగుతున్న పెట్టుబడుల సానుకూల ప్రభావాల మధ్య ‘టగ్‌ ఆఫ్‌ వార్‌’ తరహా పరిస్థితిని ఎదుర్కొంటోందని ఇంటర్నేషనల్‌ మానిటరింగ్‌ ఫండ్‌ (IMF) మేనేజింగ్‌ డైరెక్టర్‌ క్రిస్టిలినా జార్జివా తెలిపారు.

పశ్చిమాసియాలో నెలకొన్న ఉద్రిక్తతల కారణంగా చమురు సరఫరాకు అంతరాయాలు ఏర్పడినప్పటికీ.. ప్రపంచ ఆర్థిక వ్యవస్థ వాటిని అంచనాలకు మించి తట్టుకుందని ఆమె పేర్కొన్నారు. హర్మూజ్‌ జలసంధి మూసివేతతో ఇంధన సరఫరాపై ఆందోళనలు పెరిగినా.. గల్ఫ్‌ ప్రాంతాల నుంచి ప్రత్యామ్నాయంగా సరఫరా పెరగడం వల్ల సంక్షోభ తీవ్రత కొంత తగ్గిందని వివరించారు.

మరోవైపు ఏఐ రంగంలో పెట్టుబడులు వేగంగా పెరుగుతున్నాయని జార్జివా తెలిపారు. అమెరికాలో ప్రారంభమైన ఏఐ పెట్టుబడుల ఉత్సాహం ప్రస్తుతం ఇతర దేశాలకు కూడా విస్తరిస్తోందన్నారు. ఈ పెట్టుబడులు ఉత్పాదకత, పెట్టుబడులు, ప్రపంచ ఆర్థిక వృద్ధికి కొంతమేర మద్దతు అందిస్తున్నాయని చెప్పారు.

అయితే చమురు ధరలు మరింత పెరిగితే ద్రవ్యోల్బణ ఒత్తిళ్లు తీవ్రతరం కావచ్చని ఆమె హెచ్చరించారు. ద్రవ్యోల్బణాన్ని నియంత్రించేందుకు కేంద్ర బ్యాంకులు వడ్డీ రేట్లను ఎక్కువ కాలం కఠిన స్థాయిలో కొనసాగించే అవకాశం ఉంటుందని పేర్కొన్నారు. దీనివల్ల రుణ వ్యయం పెరగడంతో పాటు ఆర్థిక కార్యకలాపాలపై ప్రతికూల ప్రభావం పడే ప్రమాదం ఉందన్నారు.

ముఖ్యంగా తక్కువ ఆదాయ దేశాలపై ఇంధన ధరల పెరుగుదల ప్రభావం అధికంగా ఉండొచ్చని జార్జివా తెలిపారు. ఇంధన దిగుమతులపై అధికంగా ఆధారపడే దేశాలకు పెరిగిన చమురు ధరలు ఆర్థిక భారాన్ని మరింత పెంచవచ్చని పేర్కొన్నారు. ఈ నేపథ్యంలో ప్రపంచ ఆర్థిక వ్యవస్థలో స్థిరత్వం కోసం ఇంధన సరఫరా, ద్రవ్యోల్బణం, పెట్టుబడుల పరిణామాలను నిశితంగా గమనించాల్సిన అవసరం ఉందన్నారు.