తెలుగు మీడియాకు మర్యాదపూర్వక విందు.. రష్మిక గురించి విజయ్ క్రేజీ కామెంట్స్!

టాలీవుడ్‌లో ఎంతో కాలంగా అభిమానులను ఆకట్టుకుంటున్న జంట విజయ్ దేవరకొండ – రష్మిక వివాహ వేడుకలు ప్రస్తుతం చర్చనీయాంశంగా మారాయి. ఈ జంట వెడ్డింగ్ రిసెప్షన్ బుధవారం (మార్చి 4) సాయంత్రం ఘనంగా జరగనుంది. రిసెప్షన్‌కు ముందు తెలుగు మీడియాను ప్రత్యేకంగా కలిసిన ఈ జంట తమ ఆనందాన్ని పంచుకుంది.

మీడియాతో మాట్లాడిన విజయ్ దేవరకొండ సరదాగా స్పందిస్తూ.. “తెలుగు రాష్ట్రాలకు కొత్త కోడలు వచ్చిందండి.. ఆమెను బాగా చూసుకోండి” అని చెప్పడంతో అక్కడున్న వారంతా నవ్వుల్లో మునిగిపోయారు. తమ సినీ ప్రయాణంలో మీడియా ఎప్పుడూ ముఖ్యమైన భాగమని ఆయన పేర్కొన్నారు. పెళ్లి అనంతరం జంటగా మీడియా ముందుకు రావడం చాలా ప్రత్యేకంగా అనిపిస్తోందని చెప్పారు.

“కాలం చాలా వేగంగా గడుస్తోంది. మనం పెద్దవాళ్లమవుతున్నాం, జీవితం గురించి ఎన్నో కొత్త విషయాలు నేర్చుకుంటున్నాం. కానీ ఈ ప్రయాణంలో మాతో పాటు నడిచిన మీడియాను ఎప్పటికీ మర్చిపోము. మీరు మా కుటుంబంలా ఉంటారు. మీ ఆశీస్సులు మాకు ఎప్పటికీ అవసరం” అని విజయ్ తెలిపారు.

ఇక రష్మిక మాట్లాడుతూ, “మేము ఇద్దరం కలిసి జీవితంలో కొత్త అధ్యాయం ప్రారంభించాం. ఈ సంతోషాన్ని అందరితో పంచుకోవడం మాకు చాలా ఆనందంగా ఉంది. అభిమానులు, మీడియా ఎప్పుడూ మాకు అండగా నిలిచారు. మీ అందరి ప్రేమ, ఆశీస్సులు మా జీవితంలో చాలా ముఖ్యమైనవి” అని అన్నారు.

ఇప్పటికే ఈ జంట అభిమానులతో కలిసి వివాహ వేడుకలను ప్రత్యేకంగా జరుపుకుంది. మార్చి 1న పలు నగరాల్లో అభిమానులకు స్వీట్లు పంపిణీ చేయడంతో పాటు కొన్నిఆలయాల్లో అన్నదానం నిర్వహించారు. అలాగే మంగళవారం హైదరాబాద్‌లో అభిమానులకు ప్రత్యేక విందు ఏర్పాటు చేసి వారితో కలిసి ఆనందాన్ని పంచుకున్నారు.

విజయ్–రష్మిక జంటకు సినీ పరిశ్రమలోనే కాకుండా దేశవ్యాప్తంగా పెద్ద ఎత్తున అభిమానులు ఉన్నారు. వీరి పెళ్లి వార్త బయటకు వచ్చినప్పటి నుంచి సోషల్ మీడియాలో కూడా విస్తృతంగా చర్చ సాగుతోంది. ఈ నేపథ్యంలో బుధవారం జరగనున్న రిసెప్షన్‌కు పలువురు సినీ ప్రముఖులు, రాజకీయ నాయకులు, వ్యాపారవేత్తలు మరియు ఇతరరంగాలకు చెందిన ప్రముఖులు హాజరుకానున్నారు.

అతిథుల రాకపోకలను దృష్టిలో ఉంచుకుని వేడుక ప్రాంగణంలో కట్టుదిట్టమైన భద్రతా ఏర్పాట్లు చేస్తున్నారు. భారీ సంఖ్యలో అభిమానులు కూడా ఈ జంటను ఒకసారి చూసేందుకు రావచ్చని అంచనా వేస్తున్నారు. ఈ నేపథ్యంలో నిర్వాహకులు అన్ని ఏర్పాట్లు పూర్తి చేసినట్లు సమాచారం