యుద్ధరంగంలోకి తొలిసారి ఇరాన్‌ ‘డ్యాన్సింగ్‌ మిసైల్‌’

మధ్యప్రాచ్యంలో కొనసాగుతున్న ఉద్రిక్త పరిస్థితుల మధ్య ఇరాన్‌ మొదటిసారిగా ‘డ్యాన్సింగ్‌ మిసైల్‌’గా పిలిచే సెజ్జిల్‌ క్షిపణిని యుద్ధరంగంలో వినియోగించినట్లు అంతర్జాతీయ మీడియా నివేదిస్తోంది. అమెరికా మరియు ఇజ్రాయెల్‌ స్థావరాలే లక్ష్యంగా ఈ క్షిపణులను ప్రయోగించినట్లు సమాచారం.

ఇరాన్‌ గల్ఫ్‌ ప్రాంతంలోని బహ్రెయిన్‌, సౌదీ అరేబియా, యునైటెడ్‌ అరబ్‌ ఎమిరేట్స్‌ ప్రాంతాలపై కూడా భారీగా డ్రోన్లు, క్షిపణులతో దాడులు కొనసాగిస్తున్నట్లు తెలుస్తోంది. ఈ పరిణామాలు మధ్యప్రాచ్యంలో పరిస్థితులను మరింత ఉద్రిక్తంగా మారుస్తున్నాయి.

స్వదేశీ సాంకేతికతతో రూపొందించిన సెజ్జిల్‌ క్షిపణిని ‘డ్యాన్సింగ్‌ మిసైల్‌’ లేదా ‘అషౌరా’ అనే పేర్లతో కూడా పిలుస్తారు. ఈ క్షిపణి సుదూర ప్రాంతాల్లోని లక్ష్యాలను అత్యంత ఖచ్చితంగా ధ్వంసం చేయగల సామర్థ్యం కలిగి ఉంది.

ఈ క్షిపణి దాదాపు 2,000 కిలోమీటర్ల దూరం వరకు ప్రయాణించగలదు. అలాగే సుమారు 700 కిలోల వార్‌హెడ్‌ను మోసుకెళ్లే సామర్థ్యం దీనికి ఉంది. గాల్లో ప్రయాణించే సమయంలో మార్గాన్ని మార్చుకుంటూ లక్ష్యాన్ని చేరుకునే ప్రత్యేక లక్షణం ఉండటంతో దీనిని “డ్యాన్సింగ్‌ మిసైల్‌”గా పిలుస్తారు.

సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్ (CSIS) వివరాల ప్రకారం ఈ క్షిపణి సుమారు 18 మీటర్ల పొడవు, 1.25 మీటర్ల వ్యాసం, 23,600 కిలోల బరువు కలిగి ఉంటుంది. ఐరన్‌ డోమ్‌ వంటి క్షిపణి రక్షణ వ్యవస్థలను తప్పించుకునే విధంగా దీన్ని రూపొందించినట్లు చెబుతున్నారు.

ఇరాన్‌ ఈ క్షిపణి రూపకల్పనను 1990లో ప్రారంభించింది. మొదటిసారిగా 2008లో పరీక్షలు నిర్వహించారు. ఆ సమయంలో ఇది సుమారు 800 కిలోమీటర్ల దూరం ప్రయాణించింది. అనంతరం నావిగేషన్‌ వ్యవస్థలను మెరుగుపరచి 2009లో మళ్లీ పరీక్షించారు.

తదుపరి పరీక్షల్లో ఈ క్షిపణి మరింత దూరం ప్రయాణించే సామర్థ్యాన్ని సాధించింది. ఆరోసారి పరీక్ష సమయంలో దాదాపు 1,900 కిలోమీటర్ల దూరం ప్రయాణించి హిందూ మహాసముద్రం వరకు చేరినట్లు నివేదికలు పేర్కొంటున్నాయి. ఈ క్షిపణి వినియోగం మధ్యప్రాచ్య ప్రాంతంలో భద్రతా పరిస్థితులను మరింత సంక్లిష్టం చేయవచ్చని అంతర్జాతీయ విశ్లేషకులు భావిస్తున్నారు.