జోగి కుటుంబం వేధింపులపై ఫిర్యాదు చేసినా ఫలితం లేదు: మేఘన

మాజీ మంత్రి జోగి రమేష్‌ కుటుంబం నుంచి తనకు వేధింపులు ఎదురయ్యాయని ఆయన కోడలు మేఘన ఆరోపించారు. ఈ వ్యవహారంపై విజయవాడ నగర పోలీస్‌ కమిషనర్‌కు ఫిర్యాదు చేసినప్పటికీ సమస్య పరిష్కారం కాలేదని తెలిపారు. రాజీ చేసుకునేలా న్యాయవాదుల ద్వారా ప్రయత్నాలు జరిగాయని, అనంతరం సజ్జల రామకృష్ణారెడ్డి వద్దకు తీసుకెళ్లారని చెప్పారు. అయితే అక్కడ కూడా కాలయాపన జరిగిందే తప్ప తనకు న్యాయం జరగలేదని ఆమె పేర్కొన్నారు.

తర్వాత వైఎస్‌ జగన్‌ కార్యాలయానికి వెళ్లినా ఆయనను కలిసే అవకాశం లభించలేదని మేఘన తెలిపారు. న్యాయం కోసం తాను పలువురిని కలిశానని, రాజకీయ ప్రయోజనాల కోసం ఎవరినీ కలవలేదని స్పష్టం చేశారు. తాము చంద్రబాబు, లోకేశ్‌ను కలిశామని జోగి రమేష్‌ చేస్తున్న ఆరోపణల్లో వాస్తవం లేదన్నారు.

పెళ్లైన రెండు నెలలకే తన భర్త రాజీవ్‌ విడాకుల పిటిషన్‌ దాఖలు చేశారని, అయితే కోర్టు దాన్ని కొట్టివేసిందని మేఘన తెలిపారు. తన భర్తకు సంబంధించిన సమస్యలు ముందే తెలిసినా తనతో వివాహం జరిపించారని ఆరోపించారు. తనకు విడాకులు ఇచ్చి విముక్తి కల్పించాలని, న్యాయం జరిగే వరకు పోరాటం కొనసాగిస్తానని చెప్పారు.

పెళ్లికి ముందు జోగి కుటుంబం తమను హిందువులమని నమ్మించిందని, వివాహం తర్వాత వారు క్రైస్తవ మతాన్ని పాటిస్తున్న విషయం తెలిసిందని మేఘన ఆరోపించారు. మతం మారాలని తనపై ఒత్తిడి తెచ్చారని తెలిపారు. అదనపు కట్నం కోసం పెళ్లైన కొద్దికాలానికే వేధింపులు ప్రారంభమయ్యాయని, తన భర్తతో సమస్యలను అత్తకు చెప్పినప్పుడు అదనపు కట్నం తీసుకొస్తేనే పరిస్థితి మారుతుందని చెప్పినట్లు ఆరోపించారు.

జోగి రమేష్‌ తనను కూతురిలా భావించానని చెప్పడం పట్ల కూడా మేఘన స్పందించారు. తనకు ఎదురైన అనుభవాలను వివరిస్తూ తీవ్ర వ్యాఖ్యలు చేశారు. తన భద్రత కోసం తాను తీసుకున్న వీడియోలను కృత్రిమ మేధతో రూపొందించినవిగా ప్రచారం చేస్తున్నారని, అవి నిజమైనవేనని నిరూపిస్తామని చెప్పారు.

మేఘన తండ్రి అనంత కృష్ణగౌడ్‌ కూడా ఈ వ్యవహారంపై స్పందించారు. కుమారుడి లోపాలు తెలిసినా వివాహం ఎందుకు జరిపించారో జోగి రమేష్‌ సమాధానం చెప్పాలని డిమాండ్‌ చేశారు. అదనపు కట్నం కోసం వేధింపులు జరిగాయని ఆరోపిస్తూ, తమకు న్యాయం జరగకపోతే జోగి రమేష్‌ ఇంటి ముందు కుటుంబంతో కలిసి ధర్నా చేస్తామని తెలిపారు. ముఖ్యమంత్రి చంద్రబాబు, మంత్రి లోకేశ్‌ తమకు న్యాయం చేయాలని కోరారు.