కల్యాణీ డ్యాంలో వేగంగా తగ్గుతున్న నీటి నిల్వలు

తిరుమల శ్రీవారి భక్తులు, తిరుపతి నగరవాసుల తాగునీటి అవసరాలను తీర్చే కీలక జల వనరు కల్యాణీ డ్యాంలో నీటి నిల్వలు రోజురోజుకూ తగ్గిపోతున్నాయి. వర్షాభావ పరిస్థితులు, ఎల్‌నినో ప్రభావం కారణంగా శేషాచలం కొండల నుంచి డ్యాంలోకి వచ్చే నీటి ప్రవాహం పూర్తిగా తగ్గిపోయింది. దీంతో తిరుపతి నీటి సరఫరాపై అధికారులు ప్రత్యేక దృష్టి సారించారు.

సుమారు ఐదు దశాబ్దాల క్రితం నిర్మించిన కల్యాణీ డ్యాం పూర్తి స్థాయి సామర్థ్యం 0.91 టీఎంసీలు కాగా, ప్రస్తుతం డ్యాంలో 0.347 టీఎంసీల నీరు మాత్రమే అందుబాటులో ఉంది. 100 అడుగుల గరిష్ఠ ఎత్తు ఉన్న డ్యాంలో ప్రస్తుతం నీటిమట్టం 35 అడుగులకు పడిపోయింది. ఇదే పరిస్థితి కొనసాగితే ప్రస్తుతం ఉన్న నీటి నిల్వలు మరో మూడు నెలల వరకు మాత్రమే సరిపోతాయని అధికారులు అంచనా వేస్తున్నారు.

మరోవైపు డ్యాం నిర్మాణంలో ఏర్పడిన లీకేజీల కారణంగా ప్రతిరోజూ కొంతమేర నీరు వృథాగా పోతోంది. లీకేజీలను అరికట్టేందుకు గతేడాది మద్రాస్‌ ఐఐటీ నిపుణులు డ్యాంను పరిశీలించి మరమ్మతులు చేపట్టాలని సూచించారు. నిపుణుల నివేదిక ఆధారంగా పనులు చేపట్టేందుకు అధికారులు చర్యలు ప్రారంభించినప్పటికీ, నిధుల మంజూరులో జాప్యం జరుగుతోంది.

డ్యాం లీకేజీల నివారణ, నిర్మాణ బలోపేతం కోసం రూ.20 లక్షలతో మరమ్మతుల ప్రతిపాదనలు సిద్ధం చేసి ఉన్నతాధికారుల అనుమతికి పంపించినట్లు డ్యాం ఏఈ సుదీప్ తెలిపారు. నిధులు విడుదలైన వెంటనే పనులు ప్రారంభించి సెప్టెంబర్‌లో మరమ్మతులు చేపట్టేందుకు ప్రణాళిక సిద్ధం చేస్తున్నట్లు వెల్లడించారు.

కల్యాణీ డ్యాంలో నీటి నిల్వలు తగ్గుతున్న నేపథ్యంలో ప్రత్యామ్నాయ నీటి వనరులపై కూడా అధికారులు దృష్టి సారిస్తున్నారు. తిరుమల యాత్రికులు, తిరుపతి ప్రజలకు ఎలాంటి ఇబ్బందులు తలెత్తకుండా నీటి సరఫరా నిర్వహణపై ప్రత్యేక ప్రణాళికలు రూపొందిస్తున్నారు. వర్షాలు కురిసి డ్యాంకు కొత్త నీరు చేరితే పరిస్థితి మెరుగుపడే అవకాశం ఉందని అధికారులు భావిస్తున్నారు.