రోజుకు 1,600 కోట్ల నష్టం.. ప్రభుత్వ రంగ చమురు సంస్థల లబోదిబో!

అంతర్జాతీయ మార్కెట్‌లో ముడి చమురు ధరలు మండుతున్నా, దేశీయంగా ఇంధన ధరలను స్థిరంగా ఉంచడం ప్రభుత్వ రంగ చమురు సంస్థలకు (OMCs) పెను భారంగా మారింది. పశ్చిమాసియా ఉద్రిక్తతల నేపథ్యంలో పెట్రోల్, డీజిల్ విక్రయాలపై ఐఓసీ, బీపీసీఎల్, హెచ్‌పీసీఎల్ సంస్థలు భారీ నష్టాలను చవిచూస్తున్నాయని మెక్వారీ గ్రూప్ తన తాజా నివేదికలో వెల్లడించింది.

లీటరుపై నష్టం.. కొండంత!

నష్టాల లెక్క: ముడి చమురు ధరల పెరుగుదల వల్ల ప్రస్తుతం చమురు కంపెనీలకు పెట్రోల్‌పై లీటరుకు రూ. 18, డీజిల్‌పై అత్యధికంగా రూ. 35 మేర నష్టం వాటిల్లుతోంది.

10 డాలర్ల సూత్రం: అంతర్జాతీయంగా బ్యారెల్ ముడి చమురు ధర ప్రతి 10 డాలర్లు పెరిగినప్పుడల్లా, దేశీయంగా చమురు సంస్థలకు లీటరుపై అదనంగా రూ. 6 మార్కెటింగ్ నష్టం జత అవుతుంది.

మొత్తం నష్టం: గత నెలలో ఒక దశలో ఈ మూడు సంస్థలు కలిపి రోజుకు రూ. 2,400 కోట్ల గరిష్ఠ నష్టాన్ని నమోదు చేశాయి.

ఎన్నికల తర్వాత ధరల వడ్డన?

రాజకీయ ప్రభావం: పశ్చిమ బెంగాల్, తమిళనాడు వంటి కీలక రాష్ట్రాల్లో ఎన్నికలు జరుగుతుండటంతో ప్రస్తుతం ధరలను పెంచకుండా ప్రభుత్వం కట్టడి చేస్తోంది. అయితే, ఎన్నికలు ముగిసిన వెంటనే సామాన్యుడిపై పెట్రో భారం పడే అవకాశం ఉందని నివేదిక హెచ్చరిస్తోంది.

ఎక్సైజ్ సుంకం ఊరట సరిపోదు: గత నెలలో లీటరుకు రూ. 10 ఎక్సైజ్ సుంకాన్ని తగ్గించినా, అది కేవలం కంపెనీల నష్టాలను కొంత తగ్గించడానికే ఉపయోగపడింది తప్ప, వినియోగదారులకు పూర్తి ప్రయోజనం చేకూరలేదు. ఒకవేళ సుంకాన్ని పూర్తిగా రద్దు చేసినా ప్రస్తుత నష్టాలను పూడ్చుకోవడం కష్టమేనని విశ్లేషణలు చెబుతున్నాయి.

ఆర్థిక వ్యవస్థపై ప్రభావం

ద్రవ్యలోటు: ఎక్సైజ్ సుంకాన్ని పూర్తిగా రద్దు చేస్తే ప్రభుత్వానికి ఏడాదికి సుమారు రూ. 3.3 లక్షల కోట్ల ఆదాయ గండి పడుతుంది. ఇది దేశ ద్రవ్యలోటును 0.8% పెంచే ప్రమాదం ఉంది.

కరెంట్ ఖాతా లోటు: పెరిగిన దిగుమతి బిల్లు కారణంగా 2026 తొలి త్రైమాసికంలో కరెంట్ ఖాతా లోటు 20 బిలియన్ డాలర్లకు పెరగొచ్చని మెక్వారీ అంచనా వేసింది