కుమార్తె కోసం రెండు శతాబ్దాల నిరీక్షణ.. గార్గికి ఘన స్వాగతం

మహారాష్ట్రలోని బీడ్‌ జిల్లాలో ఓ కుటుంబానికి సుమారు 200 ఏళ్ల తర్వాత ఆడబిడ్డ జన్మించింది. నాలుగు తరాల అనంతరం తమ కుటుంబంలోకి కుమార్తె అడుగుపెట్టడంతో దహిఫాలే కుటుంబ సభ్యులు ఆనందోత్సాహాల్లో మునిగిపోయారు. నవజాత శిశువు రాకను ప్రత్యేకంగా వేడుకగా నిర్వహించి ఘన స్వాగతం పలికారు.

ఆసుపత్రి నుంచి డిశ్చార్జ్‌ అయిన చిన్నారి గార్గిని ఆమె తల్లితో కలిసి ప్రత్యేకంగా అలంకరించిన భారీ రథంలో ఇంటికి తీసుకువచ్చారు. డప్పులు, తాళాల మోత, పాటలు, నృత్యాల మధ్య సాగిన ఈ రథయాత్ర స్థానికంగా అందరి దృష్టిని ఆకర్షించింది. కుటుంబ సభ్యులు, బంధువులతోపాటు స్థానికులు కూడా పెద్ద సంఖ్యలో పాల్గొని చిన్నారికి ఆత్మీయ స్వాగతం పలికారు.

గార్గి పుట్టుకతో తమ కుటుంబంలో చాలా కాలంగా ఉన్న ఆడపిల్ల లోటు తీరిందంటూ ఆమె తాత లింబాజీ దహిఫాలే భావోద్వేగానికి గురయ్యారు. కుటుంబంలోకి కుమార్తె రావడం ఎంతో అదృష్టంగా భావిస్తున్నామని తెలిపారు. ఇన్నేళ్లుగా ఆడపిల్ల లేదనే బాధ ఉండేదని, ఇప్పుడు ఆ లోటు తీరిందని ఆనందం వ్యక్తం చేశారు.

తన ఇద్దరు కోడళ్లను కూడా సొంత కూతుళ్ల మాదిరిగానే చూసుకున్నానని లింబాజీ తెలిపారు. ఇప్పుడు తన మనవరాలు గార్గిని సంగీతం, నృత్యాల మధ్య రథంలో ఇంటికి తీసుకురావడం జీవితంలో ఎప్పటికీ మరచిపోలేని రోజని పేర్కొన్నారు.

చిన్నారి తండ్రి కూడా తన ఆనందాన్ని పంచుకున్నారు. చాలామంది కొడుకు కావాలని కోరుకుంటారని, అయితే కూతురు పుట్టినప్పుడు కలిగే అనుభూతిని మాటల్లో చెప్పలేనని అన్నారు. తన కుమార్తెను పువ్వులా, ఎంతో అపురూపంగా పెంచుకుంటానని చెప్పారు.

మరోవైపు ఆడపిల్ల జననాన్ని ఇంత ఘనంగా వేడుకగా నిర్వహించిన దహిఫాలే కుటుంబాన్ని సామాజిక కార్యకర్త అనంత్‌ ఇంగ్లే అభినందించారు. సమాజంలోని కొన్ని వర్గాల్లో ఇప్పటికీ ఆడపిల్లల జననంపై ప్రతికూల ఆలోచనలు ఉన్నాయని, అలాంటి పరిస్థితుల్లో గార్గి రాకను కుటుంబం సంబరంగా జరుపుకోవడం మంచి సందేశాన్ని ఇస్తోందని పేర్కొన్నారు.