రామ దూత స్ఫూర్తి దాత

హనుమంతుడు అంటే కేవలం అపార బలం కలిగిన వానర దేవుడు మాత్రమే కాదు.. భక్తి, వినయం, ధైర్యం, జ్ఞానం, క్రమశిక్షణ, సేవాభావం వంటి అనేక మహోన్నత గుణాల సమాహారం. ఆయన జీవితంలోని ప్రతి సంఘటన మనిషికి ఒక గొప్ప సందేశాన్ని అందిస్తుంది. శ్రీరాముడి పట్ల ఆయన చూపిన అచంచల భక్తి, గురువుపట్ల గౌరవం, అప్పగించిన పనిని సంపూర్ణంగా పూర్తి చేసే నిబద్ధత ప్రతి ఒక్కరికీ ఆదర్శప్రాయమైనవి.

హనుమంతుడి గొప్ప లక్షణాల్లో మొదట గుర్తుకు వచ్చేది ఆయన రామభక్తి. శ్రీరాముని సేవనే తన జీవన ధ్యేయంగా భావించిన ఆంజనేయుడు, ఎప్పుడూ తన విజయాలకు తానే కారణమని భావించలేదు. “రామనామం వల్లే నేను సముద్రం దాటగలిగాను” అని చెప్పిన ఆయన వినయం నిజమైన భక్తికి ప్రతీక. ఎంత శక్తి, ప్రతిభ ఉన్నా అహంకారం లేకుండా ఉండాలని హనుమంతుడు మనకు నేర్పిస్తాడు.

అలాగే హనుమంతుడు బలవంతుడే కాదు, అత్యంత జ్ఞానవంతుడు కూడా. నవవ్యాకరణ పండితుడిగా ఆయనకు ఉన్న ఖ్యాతి ఎంతో గొప్పది. రాముడు కూడా ఆయన మాటతీరును చూసి ముగ్ధుడయ్యాడని రామాయణంలో పేర్కొంటారు. ఇది మంచి మాటతీరు, సంయమనం, భావప్రకటన ఎంత ముఖ్యమో తెలియజేస్తుంది.

విద్యార్థులకు హనుమంతుడు ఒక ఆదర్శం. సూర్యుడి వద్ద విద్యాభ్యాసం చేసినప్పుడు ఆయన చూపిన వినయం, ఏకాగ్రత, సమయపాలన, కష్టపడే తత్వం ప్రతి విద్యార్థి అలవరచుకోవాల్సిన లక్షణాలు. గురువు పట్ల గౌరవం, చదువుపట్ల నిబద్ధత ఉంటే ఏ విద్యనైనా సాధించవచ్చని ఆయన జీవితం చెబుతోంది.

కార్యదక్షతలో కూడా హనుమంతుడికి సాటి లేరు. సీతమ్మను వెతకమని చెప్పినప్పుడు కేవలం ఆమెను కనుగొనడమే కాకుండా, రావణుడి బలం తెలుసుకొని, లంకను దహనం చేసి శత్రువుల్లో భయాన్ని నింపి తిరిగి రావడం ఆయన ముందుచూపు, ధైర్యానికి నిదర్శనం. పనిని అర్ధాంతరంగా కాకుండా సంపూర్ణంగా చేయడం ఆయన ప్రత్యేకత.

కష్టకాలంలో ధైర్యంగా నిలబడటం కూడా హనుమంతుడి మహోన్నత లక్షణం. లక్ష్మణుడు మూర్ఛపోయినప్పుడు సంజీవని మూలికను గుర్తించలేకపోయినా సమయాన్ని వృథా చేయకుండా మొత్తం పర్వతాన్నే తీసుకురావడం ఆయన సమయస్ఫూర్తి, పట్టుదల ఎంత గొప్పవో చూపిస్తుంది.

హనుమంతుడు సేవకుడిగా ఎలా ఉండాలో, నాయకుడిగా ఎలా నడవాలో, భక్తుడిగా ఎలా జీవించాలో తన జీవితంతోనే ప్రపంచానికి చూపించాడు. ఆయన గుణాలను జీవితంలో అలవరచుకుంటే మన జీవితం మరింత సార్థకంగా, ఆనందమయంగా మారుతుంది.