రాత్రి వేళల్లో వేటగాళ్ల విజృంభణ

అటవీప్రాంతాల్లో వన్యప్రాణులను లక్ష్యంగా చేసుకుని వేటాడుతున్న ముఠా గుట్టు రట్టుకావడంతో టాస్క్‌ఫోర్స్ పోలీసులు ఆరుగురు నిందితులను అరెస్ట్ చేశారు. వారి వద్ద నుంచి 4 ఎయిర్ గన్స్, ఒక లైసెన్స్‌డ్ స్పోర్టింగ్ రైఫిల్, 20 తూటాలు, ఒక కారు, 8 మొబైల్ ఫోన్లు, పెల్లెట్స్, బటన్ నైఫ్ స్వాధీనం చేసుకున్నారు. ఈ ఘటన వెనుక ఉన్న నెట్‌వర్క్‌ను పోలీసులు మరింత లోతుగా విచారిస్తున్నారు.

దర్యాప్తులో బయటపడిన వివరాల ప్రకారం, ప్రధాన నిందితుడు మహ్మద్ ముజఫర్ హుస్సేన్ విలాస జీవితం కోసం వేటను అలవాటుగా మార్చుకున్నాడు. అతడికి మీర్ అహ్మద్ అమీర్, కె. శేఖర్ తదితరులతో పరిచయాలు ఏర్పడి, వన్యప్రాణులు ఎక్కువగా సంచరించే ప్రాంతాలపై సమాచారం సేకరించేవారు. ఆ తర్వాత అబ్దుల్లా బిన్ సహైన్, సౌద్ బిన్ మహ్మద్ బలాబ్, మసూద్ బిన్ కలసి ఆరుగురు ముఠాగా మారి పద్ధతిగా వేటలు నిర్వహించేవారు.

ఈ ముఠా ప్రత్యేకంగా అర్ధరాత్రి తర్వాత కారులో బయల్దేరి అడవుల్లోకి వెళ్లేది. జింకలు, కుందేళ్లు కనిపించగానే వాటి కళ్లలో హైబీమ్ లైట్లు వేయడం ద్వారా కదలకుండా చేసి, తుపాకులతో కాల్చి చంపేవారు. తెల్లవారుజామున కవుజు పిట్టలు, నెమళ్లను వేటాడేవారు. వేట దృశ్యాలను మొబైల్ ఫోన్లలో చిత్రీకరించడం కూడా వీరి అలవాటుగా ఉండేది.

దర్యాప్తులో సంచలన విషయాలు వెలుగులోకి వచ్చాయి. ఈ ఏడాది ఫిబ్రవరి వరకు ఈ ముఠా పదుల సంఖ్యలో జింకలను, 2 వేలకు పైగా కుందేళ్లను వేటాడినట్లు పోలీసులు గుర్తించారు. కుందేళ్ల మాంసాన్ని వండి తినగా, మిగతా జంతువుల అవశేషాలను జూరాల బ్యాక్‌వాటర్స్ కాలువలో పడేసి ఆధారాలను నాశనం చేసేవారు.

ఈ గ్యాంగ్ గుట్టు రట్టుకావడానికి కుటుంబ వివాదమే కారణమైంది. హుస్సేన్ తుపాకులు కొనుగోలు చేసిన విషయాన్ని గమనించిన అతని సోదరుడు, తనపై దాడి జరిగే అవకాశముందని అనుమానించి పోలీసులకు సమాచారం అందించాడు. దీంతో పోలీసులు ప్రత్యేక బృందాలను ఏర్పాటు చేసి నిందితులను అదుపులోకి తీసుకున్నారు.

హుస్సేన్ సెల్‌ఫోన్‌ను పరిశీలించగా వేట దృశ్యాలు, వన్యప్రాణుల ఫొటోలు లభించడంతో కేసు మరింత బలపడింది. ప్రస్తుతం నిందితులపై వన్యప్రాణి సంరక్షణ చట్టాల ప్రకారం కేసులు నమోదు చేసి, మరిన్ని వివరాల కోసం విచారణ కొనసాగిస్తున్నారు. ఈ ఘటనపై అటవీ శాఖ అధికారులు కూడా అప్రమత్తమై, అడవుల్లో పర్యవేక్షణను పెంచుతున్నారు.