నేపాల్‌ను వెంటాడుతున్న మరో ముప్పు.. చౌలానీ నదికి అడ్డుగా కొండచరియలు

హిమానీనదం విరిగిపడి సంభవించిన భారీ వరదల నుంచి నేపాల్‌ ఇంకా పూర్తిగా కోలుకోకముందే మరో ప్రకృతి విపత్తు ముప్పు పొంచి ఉంది. దార్చులా జిల్లాలోని భట్టార్‌ ప్రాంతంలో భారీగా కొండచరియలు విరిగిపడటంతో చౌలానీ నది ప్రవాహానికి అంతరాయం ఏర్పడింది. కొండలపై నుంచి పెద్దఎత్తున మట్టి, రాళ్లు జారిపడి నదిలో పడటంతో కొంత మేర ప్రవాహం నిలిచిపోయింది.

కొండచరియలు విరిగిపడటం ఇంకా కొనసాగుతున్నట్లు అధికారులు చెబుతున్నారు. దీంతో నదీ ప్రవాహానికి మరింత అడ్డంకి ఏర్పడి.. నది పూర్తిగా మూసుకుపోయే అవకాశం ఉందని హెచ్చరిస్తున్నారు. అలా జరిగితే నీరు వెనుకకు చేరి ఒక్కసారిగా అడ్డంకిని ఛేదించే ప్రమాదం ఉంది. అదే జరిగితే దిగువ ప్రాంతాల్లో ఆకస్మిక వరదలు సంభవించే అవకాశం ఉండటంతో అధికారులు అప్రమత్తమయ్యారు.

భట్టార్‌ ప్రాంతంలోని నదీ తీర గ్రామాల ప్రజలు అత్యంత అప్రమత్తంగా ఉండాలని దార్చులా జిల్లా యంత్రాంగం సూచించింది. పరిస్థితిని పర్యవేక్షించేందుకు భద్రతా సిబ్బందిని రంగంలోకి దించారు. అత్యవసర పరిస్థితి తలెత్తితే వెంటనే స్పందించేందుకు భద్రతా బలగాలను సిద్ధంగా ఉంచారు.

కొండచరియల కారణంగా భట్టార్‌ ప్రాంతంలోని 10 కుటుంబాలను ముందుజాగ్రత్తగా సురక్షిత ప్రాంతాలకు తరలించారు. వారిని బంధువుల ఇళ్లకు తరలించడంతో పాటు అవసరమైన సామగ్రి, టెంట్లను స్థానిక యంత్రాంగం అందించింది. ఈ ఘటనతో అక్కడి రహదారులు, నడక మార్గాలు కూడా దెబ్బతిన్నట్లు అధికారులు తెలిపారు.

ప్రస్తుతం చౌలానీ నది ప్రవాహం సాధారణ స్థాయిలోనే ఉన్నప్పటికీ పరిస్థితిని నిశితంగా గమనిస్తున్నారు. నదికి మరింతగా అడ్డంకి ఏర్పడే అవకాశం ఉన్నందున తీర ప్రాంతాల్లోని ప్రజలు నదికి సమీపంలోకి వెళ్లొద్దని అధికారులు హెచ్చరించారు. అత్యవసర పరిస్థితుల్లో సహాయం కోసం స్థానికంగా ప్రత్యేక ఫోన్‌ నంబర్లను కూడా అందుబాటులో ఉంచారు.

ఇటీవలే హిమానీనదం విరిగిపడటంతో నేపాల్‌లో భారీ స్థాయిలో వరదలు సంభవించిన నేపథ్యంలో.. తాజాగా కొండచరియల కారణంగా మరోసారి నదీ ప్రవాహాలకు ముప్పు ఏర్పడటం ఆందోళన కలిగిస్తోంది. హిమాలయ ప్రాంతంలో వరదలు, కొండచరియలు, హిమానీనద సంబంధిత ప్రమాదాలు పెరుగుతున్న నేపథ్యంలో ముందస్తు హెచ్చరిక వ్యవస్థలను మరింత బలోపేతం చేయాల్సిన అవసరం ఉందని నిపుణులు చెబుతున్నారు.