నేపాల్‌ వరద విలయం.. శిథిలాల్లో 23 మృతదేహాలు

నేపాల్‌లో వరదలు, కొండచరియల విరిగిపడటంతో నెలకొన్న విలయంలో విషాదం మరింత పెరుగుతోంది. వేలాది మంది ఇప్పటికీ ఆచూకీ లేకుండా పోవడంతో సహాయక బృందాలు గాలింపు చర్యలను ముమ్మరం చేశాయి. భవన శిథిలాలు, బురదలో చిక్కుకున్న మృతదేహాలను వెలికితీసేందుకు సిబ్బంది తీవ్రంగా శ్రమిస్తున్నారు.

నువాకోట్‌లో వరదల ధాటికి దెబ్బతిన్న ఓ భవనం నుంచి 23 మృతదేహాలను అధికారులు వెలికితీశారు. అవి కుళ్లిపోయిన స్థితిలో ఉండటంతో గుర్తింపు ప్రక్రియను చేపట్టి అనంతరం ఖననం చేసేందుకు తరలించారు. నేపాల్‌-చైనా సరిహద్దు ప్రాంతంలో ఇప్పటివరకు లభించిన మృతదేహాల సంఖ్య 978కు చేరినట్లు అధికారులు తెలిపారు. నేపాల్‌, టిబెట్‌ ప్రాంతాల్లో కలిపి 4,471 మంది గల్లంతైనట్లు వెల్లడించారు.

మరోవైపు రసువా, నువాకోట్‌ ప్రాంతాల్లోని సుమారు ఆరు సొరంగాలు, 11 ప్రాజెక్టుల్లో 930 మందికిపైగా కార్మికులు చిక్కుకుపోయినట్లు అధికారులు తెలిపారు. వారిని సురక్షితంగా బయటకు తీసుకొచ్చేందుకు సహాయక బృందాలు ప్రయత్నిస్తున్నాయి. సొరంగాల చుట్టూ భారీగా పేరుకుపోయిన బురద, ప్రతికూల వాతావరణ పరిస్థితులు సహాయక చర్యలకు ఆటంకంగా మారుతున్నాయి.

తప్పిపోయిన తమ కుటుంబ సభ్యుల కోసం వెతుకుతున్న ప్రజలతో ఆసుపత్రులు, ప్రభుత్వ కార్యాలయాలు రద్దీగా మారాయి. కొన్ని ఆసుపత్రుల్లో ఒకే మృతదేహాన్ని తమ బంధువుగా గుర్తించేందుకు పలు కుటుంబాలు ముందుకు వస్తుండటంతో గుర్తింపు ప్రక్రియలో ఇబ్బందులు ఎదురవుతున్నాయి. ఈ సమస్యను అధిగమించేందుకు అన్ని మృతదేహాలకు డీఎన్‌ఏ పరీక్షలు నిర్వహిస్తున్నట్లు అధికారులు తెలిపారు.

భారత్‌, చైనా, సింగపూర్‌, దక్షిణ కొరియా సహా పలు దేశాల నుంచి అందుతున్న సహకారంతో నేపాల్‌ సహాయక చర్యలను వేగవంతం చేసింది. ఇదిలా ఉండగా నేపాల్‌ నుంచి ఉత్తర్‌ప్రదేశ్‌లోని గండక్‌ నదిలోకి 13 మృతదేహాలు కొట్టుకొచ్చినట్లు స్థానిక అధికారులు తెలిపారు. వాటిని తిరిగి నేపాల్‌కు అప్పగించేందుకు చర్యలు చేపట్టారు.