నేపాల్‌ వరదలపై అమెరికా కీలక ప్రకటన.. భూకంపం కారణం కాదట!

నేపాల్‌లో సంభవించిన ఆకస్మిక వరదల వెనుక అసలు కారణంపై కీలక సమాచారం వెలుగులోకి వచ్చింది. తొలుత ఈ జలప్రళయానికి భూకంపమే కారణమని భావించినప్పటికీ.. అమెరికా జియాలాజికల్‌ సర్వే తాజా విశ్లేషణలో మరో విషయం వెల్లడైంది. హిమనీ సరస్సు బద్దలవడం, దాని కారణంగా భారీ మంచు, రాళ్ల చరియలు విరిగిపడటంతోనే ప్రకంపనలు ఏర్పడి ఉండొచ్చని USGS పేర్కొంది.

టిబెట్‌లోని గోసాయిన్‌కుండ ప్రాంతంలో 4.4 తీవ్రతతో ప్రకంపనలు నమోదయ్యాయి. అయితే వాటిని సాధారణ భూకంపంగా పరిగణించలేమని అనంతర విశ్లేషణలో తేలింది. పర్వత ప్రాంతంలో భారీ కొండచరియలు విరిగిపడటం వల్లే ఆ ప్రకంపనలు నమోదైనట్లు అమెరికా జియాలాజికల్‌ సర్వే వివరించింది.

హిమనీ సరస్సు బద్దలై భారీగా మంచు, రాళ్లు దిగువకు దూసుకురావడంతో లిండే నది ఉప్పొంగినట్లు నిపుణులు అంచనా వేస్తున్నారు. ఆ వరద నీరు బోటే కోషి నదిలోకి ఒక్కసారిగా చేరడంతో దిగువ ప్రాంతాల్లో ఆకస్మిక వరదలు, బురద ప్రవాహాలు తీవ్ర నష్టాన్ని మిగిల్చాయి. ఉపగ్రహ చిత్రాల్లోనూ పర్వత ప్రాంతాల నుంచి భారీ స్థాయిలో మంచు, రాళ్ల చరియలు కదిలిన ఆనవాళ్లు కనిపించినట్లు నిపుణులు చెబుతున్నారు.

ఇదే ఘటనను జర్మన్‌ రీసెర్చ్‌ సెంటర్‌ ఫర్‌ జియోసైన్సెస్‌ కూడా విశ్లేషించింది. వరదలకు సుమారు ఏడు నిమిషాల ముందు 4.4 తీవ్రతతో ప్రకంపనలు నమోదైనట్లు గుర్తించింది. ఆ తర్వాత కొద్దిసేపటికే భారీ వరద ప్రవాహం దిగువ ప్రాంతాల వైపు దూసుకొచ్చినట్లు పేర్కొంది.

ఈ విపత్తు నేపాల్‌లో భారీ ప్రాణ, ఆస్తి నష్టాన్ని మిగిల్చింది. వందల కుటుంబాలు నిరాశ్రయమయ్యాయి. అనేక మంది గల్లంతయ్యారు. టిబెట్‌ వైపున కూడా వరద ప్రభావం తీవ్రంగా ఉన్నట్లు సమాచారం. దీంతో హిమాలయ ప్రాంతాల్లో హిమనీ సరస్సులు, మంచు చరియలు, కొండచరియల కదలికలను నిరంతరం పర్యవేక్షించడం, ముందస్తు హెచ్చరిక వ్యవస్థలను మరింత బలోపేతం చేయాల్సిన అవసరం మరోసారి స్పష్టమైంది.