ప్రజల హృదయాల్లో చిరస్థాయిగా నిలిచిన రామోజీరావు: సీఎం చంద్రబాబు

రామోజీరావు ద్వితీయ వర్ధంతి సందర్భంగా ఆంధ్రప్రదేశ్ ముఖ్యమంత్రి చంద్రబాబు నాయుడు ఘన నివాళులు అర్పించారు. తెలుగు జాతి గర్వించదగ్గ మహనీయుడు, మీడియా రంగంలో యుగకర్త, అక్షర యోధుడు అయిన రామోజీరావు సేవలను సీఎం స్మరించుకున్నారు.

సామాన్య కుటుంబం నుంచి అసామాన్య శిఖరాలను అధిరోహించి, మీడియాను ప్రజా చైతన్యానికి శక్తివంతమైన సాధనంగా మలిచిన గొప్ప దార్శనికుడని కొనియాడారు. విలువలు, క్రమశిక్షణ, నిబద్ధత, ధైర్యసాహసాలతో సాగిన ఆయన ప్రస్థానం యువతకు, భావితరాలకు మార్గదర్శకమని పేర్కొన్నారు.

పత్రికా రంగాన్ని కేవలం వ్యాపారంగా కాకుండా సామాజిక బాధ్యతగా భావించి ఆచరించిన అరుదైన వ్యక్తిత్వం రామోజీరావుదని సీఎం అన్నారు. తెలుగు ప్రజలు గర్వించే మీడియా సంస్థలను నిర్మించి, జర్నలిజంలో నాణ్యత, విశ్వసనీయతకు కొత్త ప్రమాణాలు నెలకొల్పారని గుర్తుచేశారు.

ఆయన ఆలోచనలు, సేవలు, విలువలు ఎప్పటికీ సమాజానికి స్ఫూర్తినిస్తూనే ఉంటాయని చంద్రబాబు పేర్కొన్నారు. ప్రజల హృదయాల్లో రామోజీరావు స్థానం శాశ్వతమని, ఆయన కీర్తి చిరకాలం నిలిచిపోతుందని అన్నారు.

మంత్రి అచ్చెన్నాయుడు కూడా రామోజీరావుకు నివాళులర్పిస్తూ, మీడియా రంగంలో విప్లవాత్మక మార్పులకు శ్రీకారం చుట్టిన మహోన్నత వ్యక్తిగా కొనియాడారు. క్రమశిక్షణ, పట్టుదల, అంకితభావానికి ఆయన నిలువెత్తు నిదర్శనమని పేర్కొన్నారు.