కియా ఇండియాతో ఒప్పందం కుదుర్చుకున్న రతన్ టాటా ఇన్నోవేషన్ హబ్

రాజధాని అమరావతిలోని రతన్‌ టాటా ఇన్నోవేషన్‌ హబ్‌ (RTIH)లో అడ్వాన్స్‌డ్ ప్రొటోటైపింగ్ అండ్ ఇన్నోవేషన్ సెంటర్‌ (APIC) ఏర్పాటు చేయనున్నట్లు ఆర్‌టీఐహెచ్‌ సీఈవో ధాత్రి రెడ్డి తెలిపారు. ఈ కేంద్రం ద్వారా ప్రపంచ స్థాయి ప్రోటోటైపింగ్, ప్రెసిషన్ మాన్యుఫ్యాక్చరింగ్, ప్రొడక్ట్ డెవలప్‌మెంట్ సదుపాయాలు అందుబాటులోకి రానున్నాయి.

ఈ ప్రాజెక్టు కోసం రతన్ టాటా ఇన్నోవేషన్ హబ్ (RTIH), కియా ఇండియా (Kia India) మధ్య అవగాహన ఒప్పందం (MoU) కుదిరింది. ఈ ఒప్పందంపై RTIH సీఈవో ధాత్రి రెడ్డి, కియా ఇండియా ముఖ్య పరిపాలనాధికారి టే హ్యూన్ కిమ్ సోమవారం సంతకాలు చేశారు. ఇందులో భాగంగా కియా ఇండియా తన కార్పొరేట్ సోషల్ రెస్పాన్సిబిలిటీ (CSR) నిధుల నుంచి రూ.14 కోట్లు సమకూర్చనుంది.

ధాత్రి రెడ్డి మాట్లాడుతూ, వినూత్న ఆలోచనలు కలిగిన స్టార్టప్‌లు, ఆవిష్కర్తలు, పరిశోధకులు, విద్యార్థులు, పారిశ్రామికవేత్తలకు ఈ కేంద్రం కీలక వేదికగా నిలుస్తుందని తెలిపారు. ప్రోటోటైపింగ్ ల్యాబ్‌లో 3D ప్రింటర్లు, ఆధునిక తయారీ పరికరాలు అందుబాటులో ఉంటాయని ఆయన పేర్కొన్నారు.

ఈ ఏపీఐసీ కేంద్రం “ఆలోచన నుంచి ఉత్పత్తి వరకు” అనే మధ్యంతర దశను తగ్గిస్తూ, స్టార్టప్‌లకు వేగంగా ప్రొడక్ట్ డెవలప్‌మెంట్ చేసే అవకాశం కల్పించనుంది. ఆన్‌లైన్ ద్వారా కూడా సేవలు పొందే అవకాశం ఉండగా, నిపుణుల మెంటారింగ్ ద్వారా డిజైన్ మార్పులు, తయారీ ప్రక్రియ, అవసరమైన సామగ్రి, సమయం వంటి అంశాలపై మార్గదర్శనం అందించనున్నారు.

ప్రాథమిక నమూనాల (ప్రోటోటైప్స్) తయారీకి పూర్తి స్థాయి సదుపాయాలు ఇక్కడే అందుబాటులో ఉంటాయి. ఏఐ (Artificial Intelligence), రోబోటిక్స్, ఎలక్ట్రానిక్స్, ఎంబెడెడ్ సిస్టమ్స్, స్మార్ట్ మాన్యుఫ్యాక్చరింగ్, మొబిలిటీ టెక్నాలజీస్, ఇండస్ట్రియల్ ఆటోమేషన్ వంటి ఆధునిక రంగాల్లో ఆవిష్కరణలకు ఈ కేంద్రం దోహదపడనుంది.

మొత్తంగా అమరావతిలోని ఈ ఇన్నోవేషన్ హబ్, స్టార్టప్ ఎకోసిస్టమ్‌ను బలోపేతం చేస్తూ, రాష్ట్రాన్ని సాంకేతిక ఆవిష్కరణల కేంద్రంగా మార్చే దిశగా కీలక అడుగుగా భావిస్తున్నారు.