సాయి పేరంటరల్స్‌కు ఆస్ట్రేలియాలో భారీ ఒప్పందం పొడిగింపు

హైదరాబాద్‌కు చెందిన ప్రముఖ ఔషధ తయారీ సంస్థ సాయి పేరంటరల్స్‌కు చెందిన ఆస్ట్రేలియా అనుబంధ సంస్థ నౌమెడ్ ఫార్మాస్యూటికల్స్ అక్కడి అతిపెద్ద ఔషధ పంపిణీ సంస్థతో ఉన్న కీలక ఒప్పందాన్ని మరో ఏడున్నరేళ్ల పాటు పొడిగించుకుంది. అవసరమైతే ఈ ఒప్పందాన్ని మరో మూడు సంవత్సరాలు కొనసాగించే అవకాశం కూడా ఉందని సంస్థ వెల్లడించింది.

ఈ ఒప్పందం ద్వారా నౌమెడ్ ఫార్మాస్యూటికల్స్ సుమారు రూ.1,300 కోట్ల విలువైన అమ్మకాలు నమోదు చేసే అవకాశముందని కంపెనీ అంచనా వేస్తోంది. ఆస్ట్రేలియాలో ఓటీసీ (ఓవర్ ది కౌంటర్) ఔషధాల మార్కెట్లో తమ స్థాయిని మరింత బలోపేతం చేసుకోవడానికి ఈ ఒప్పందం దోహదపడుతుందని సాయి పేరంటరల్స్ మేనేజింగ్ డైరెక్టర్ కె. అనిల్ కుమార్ తెలిపారు.

ఈ భాగస్వామ్యంతో ప్రతి ఏడాది కనీసం 12 కొత్త ఔషధాలను మార్కెట్లోకి తీసుకురావాలని లక్ష్యంగా పెట్టుకున్నట్లు ఆయన వెల్లడించారు. అత్యున్నత నాణ్యత ప్రమాణాలతో ఔషధాలను తయారు చేస్తున్నందువల్లే ప్రపంచంలోని ఇతర నియంత్రిత ఔషధ మార్కెట్లలో కూడా విస్తరించే అవకాశాలు లభిస్తున్నాయని చెప్పారు.

మందుల అనుమతులు పొందడం, ముడి పదార్థాల సేకరణ, తయారీ, నాణ్యత నియంత్రణ, పంపిణీ వరకు మొత్తం ప్రక్రియను నౌమెడ్ ఫార్మాస్యూటికల్స్ నిర్వహించనుంది. తుది ఉత్పత్తులను ఆస్ట్రేలియాలోని పంపిణీ భాగస్వామికి అందించడం ద్వారా వినియోగదారులకు వేగంగా చేరవేయాలని సంస్థ ప్రణాళిక రూపొందించింది. ఈ ఒప్పందం సాయి పేరంటరల్స్ అంతర్జాతీయ వ్యాపార విస్తరణకు మరో కీలక మైలురాయిగా భావిస్తున్నారు.