బేబీ కోసం అన్నీ సిద్ధం.. కానీ ఆ విషయంలో కాస్త టెన్షన్‌గా ఉంది: సమంత

నటి సమంత ప్రస్తుతం తన జీవితంలో ఓ కొత్త అధ్యాయాన్ని ఆస్వాదిస్తున్నారు. తల్లికాబోతున్న ఆనందంలో ఉన్న ఆమె.. బేబీమూన్ ట్రిప్‌ను ఆస్వాదిస్తూ, తన ఆరోగ్యం కోసం వ్యాయామం చేస్తూ అభిమానులతో క్షణాలను పంచుకుంటున్నారు. తాజాగా ఇన్‌స్టాగ్రామ్ వేదికగా అభిమానులతో మాట్లాడిన సమంత.. తన మాతృత్వ అనుభవాలను వెల్లడించారు.

బిడ్డ కోసం ఇప్పటికే అవసరమైన వస్తువులన్నీ కొనుగోలు చేసినట్లు తెలిపిన సమంత.. వాటిని చూస్తుంటే కాస్త భావోద్వేగానికి గురవుతున్నానని చెప్పారు. ప్రస్తుతం వాటిని ప్యాక్ చేసి ఆ బ్యాగ్‌ను లాప్‌టాప్ స్టాండ్‌గా ఉపయోగిస్తున్నానని సరదాగా వెల్లడించారు.

ప్రెగ్నెన్సీ సమయంలో వస్తున్న వింత కలల గురించి ఓ అభిమాని అడిగిన ప్రశ్నకు స్పందిస్తూ.. తనకు కూడా ఇలాంటి అనుభవమే ఎదురవుతోందని తెలిపారు. బరువు పెరిగారా అన్న ప్రశ్నకు సమాధానంగా ఇప్పటివరకు 11 కేజీలు పెరిగానని చెప్పారు.

తల్లి అయిన తర్వాత జీవితంలో వచ్చే మార్పుల గురించి మాట్లాడుతూ.. బిడ్డకు పాలు పట్టడం, జోలపాడి నిద్రపుచ్చడం వంటి పనులు పూర్తి సమయం బాధ్యతగా మారుతాయని, అయితే అవి ఎంతో అందమైన అనుభూతిని ఇస్తాయని సమంత పేర్కొన్నారు.

మాతృత్వం ఆత్మవిశ్వాసాన్ని పెంచుతుందని ఓ అభిమాని చెప్పగా.. ఈ విషయం తనకు ఇప్పటివరకు తెలియదని, మంచి విషయాన్ని పంచుకున్నందుకు ధన్యవాదాలు తెలిపారు.

ఇక పుట్టబోయే బిడ్డకు ఏ పేరు పెడతారన్న ప్రశ్నకు స్పందిస్తూ.. పేరు ఎంపిక చేయడం చాలా కష్టమైన విషయమని, అందుకు అభిమానుల సహాయం కావాలని సమంత కోరారు.

స్కానింగ్ రిపోర్టుల సమయంలో వచ్చే ఆందోళన గురించి ఓ అభిమాని అడగగా.. ఆ భయం తనకు మాత్రమే అనుకున్నానని, ఇతర తల్లుల అనుభవాలు తెలుసుకోవడం ద్వారా కొంత ఊరట లభించిందని చెప్పారు.

తన జీవితంలో వచ్చిన ఈ కొత్త దశను పూర్తిగా ఆస్వాదిస్తున్నానని సమంత వెల్లడించారు.