ఓటర్‌ జాబితా సవరణ.. 35 ఏళ్లుగా దూరమైన అన్నదమ్ములను కలిపింది

కుటుంబ వివరాల గురించి అడిగారు. తన స్వగ్రామం మానోహర్‌పూర్‌ అని, తన అన్న పేరు దల్బీర్‌ సింగ్‌ అని సీతారామ్‌ తెలిపారు. అనూహ్యంగా ఆ అధికారికి దల్బీర్‌ వ్యక్తిగతంగా పరిచయం ఉండటంతో పాటు ఆయన ఫోన్‌ నంబర్‌ కూడా ఉండటం పరిస్థితిని పూర్తిగా మార్చేసింది.

అధికారి చొరవ తీసుకుని దల్బీర్‌ను సంప్రదించడంతో 35 ఏళ్ల తర్వాత అన్నదమ్ములు మళ్లీ కలుసుకున్నారు. ఒకరినొకరు చూసుకున్న వెంటనే ఆప్యాయంగా కౌగిలించుకున్నారు. ఇన్నేళ్ల తర్వాత కలిసిన ఆనందం, భావోద్వేగంతో ఇద్దరి కళ్లలో కన్నీళ్లు తిరిగాయి. ఈ దృశ్యాన్ని చూసిన పాఠశాల సిబ్బంది, అక్కడున్న ఇతరులు కూడా భావోద్వేగానికి లోనయ్యారు.

సీతారామ్‌ చిన్న వయసులోనే కుటుంబానికి దూరమయ్యారు. చిన్నతనంలో పోలియోతో బాధపడటంతో చికిత్స కోసం కుటుంబ సభ్యులు ఆయనను పంజాబ్‌కు తీసుకెళ్లారు. వైద్యుల సూచన మేరకు కొంతకాలం అక్కడే ఉంచారు. అయితే అనంతరం కుటుంబ సభ్యులు తిరిగి వెళ్లిన సమయంలో సీతారామ్‌ అక్కడ కనిపించలేదు. దీంతో కుటుంబ సభ్యులు ఆయన కోసం చాలాకాలం వెతికారు. బంధువులు, పరిచయస్తులను సంప్రదించినా ఎలాంటి ఆచూకీ లభించలేదు.

మరోవైపు సీతారామ్‌ పంజాబ్‌లోనే ఉండిపోయారు. అక్కడే వివిధ పనులు చేసుకుంటూ జీవనం సాగించారు. కొంతకాలం ఓ ప్రైవేట్‌ పాఠశాలలో ప్యూన్‌గా పనిచేసిన ఆయన అనంతరం ప్రభుత్వ ఉద్యోగం కూడా సంపాదించుకున్నారు. ఈ క్రమంలో సంవత్సరాలు గడిచిపోయాయి.

ఇటీవల పంజాబ్‌లో జరుగుతున్న SIR ప్రక్రియలో తన వివరాలను ధ్రువీకరించుకోవాల్సి రావడంతో పాత విద్యా ధ్రువపత్రం అవసరమైంది. దీంతో 35 ఏళ్ల తర్వాత సీతారామ్‌ తన పాత గ్రామానికి, తాను చదువుకున్న పాఠశాలకు తిరిగి వచ్చారు. అదే ప్రయాణం ఆయనను తన అన్న దల్బీర్‌ సింగ్‌ దగ్గరకు చేర్చింది. ఒక ప్రభుత్వ ప్రక్రియకు అవసరమైన పాత సర్టిఫికెట్‌ కోసం వెళ్లిన ఆయనకు ఏళ్లుగా దూరమైన అన్నను తిరిగి కలుసుకునే అవకాశం దక్కింది.