సూర్య వ్యూహం వర్క్ అయింది… భారత్ ఘన విజయం

పొట్టి ప్రపంచకప్‌లో(ICC Men’s T20 World Cup)భాగంగా దిల్లీ వేదికగా నమీబియాతో జరిగిన మ్యాచ్‌లో భారత జాతీయ క్రికెట్ జట్టు
93 పరుగుల తేడాతో ఘన విజయం సాధించింది. ఈ విజయానంతరం టీ20 కెప్టెన్‌ సూర్యకుమార్ యాదవ్ మ్యాచ్‌పై స్పందిస్తూ ఆసక్తికర వ్యాఖ్యలు చేశాడు.

“పిచ్‌ అంత సులువు కాదు”

సూర్య మాట్లాడుతూ, “ఈ పిచ్‌పై బ్యాటింగ్‌ చేయడం అంత ఈజీ కాదు. ప్రారంభంలోనే వికెట్లు కోల్పోయాం. కానీ సరైన భాగస్వామ్యాలతో చివర్లో బలమైన స్కోరు సాధించగలిగాం” అని తెలిపాడు.ప్రత్యేకంగా ఇషాన్ కిషన్ (61) ఇన్నింగ్స్‌ జట్టుకు మంచి పునాది వేసిందని కొనియాడాడు. అలాగే మధ్య ఓవర్లలో హార్దిక్ పాండ్య
ఆడిన వేగవంతమైన హాఫ్‌ సెంచరీ మ్యాచ్‌ మలుపుతిప్పిందన్నాడు.

కీలక భాగస్వామ్యం

త్వరగా మూడు వికెట్లు కోల్పోయిన తర్వాత శివమ్‌ దూబె – హార్దిక్‌ పాండ్య జంట 39 బంతుల్లో 81 పరుగుల భాగస్వామ్యంతో జట్టును పటిష్ట స్థితికి చేర్చింది. ఆ భాగస్వామ్యం లేకపోయి ఉంటే 200 పరుగుల మార్క్‌ దాటడం కష్టమయ్యేదని విశ్లేషకులు అభిప్రాయపడుతున్నారు.

బుమ్రా – స్పిన్‌ కాంబోపై ప్రశంసలు

బౌలింగ్‌ విభాగంలో జస్‌ప్రీత్ బుమ్రా తన నాలుగు ఓవర్ల కోటాను పూర్తి చేయడం శుభసూచకమని సూర్య పేర్కొన్నాడు. వచ్చే మ్యాచ్‌కు బుమ్రా పూర్తి ఫిట్‌గా ఉన్నాడని తెలిపాడు.అలాగే అక్షర్‌ పటేల్‌, వరుణ్‌ చక్రవర్తి స్పిన్‌ జోడీని ఎదుర్కోవడం ప్రత్యర్థులకు కష్టమేనని అన్నాడు.

నమీబియా బౌలర్లకు కృతజ్ఞతలు

సూర్యకుమార్‌ నమీబియా బౌలర్లను ప్రత్యేకంగా ప్రశంసించాడు. “వారు కసితో బౌలింగ్‌ చేశారు. తమ ప్రణాళికలను అద్భుతంగా అమలు చేశారు. పరిస్థితులకు తగ్గట్టు బంతులు వేశారు” అని అన్నాడు.భారీ స్కోరు వచ్చినా, ప్రత్యర్థి బౌలర్ల క్రమశిక్షణ గమనించదగ్గదని అభిప్రాయపడ్డాడు.