తెలంగాణలో కొత్త రేషన్‌ కార్డుల పంపిణీకి రంగం సిద్ధం

తెలంగాణ రాష్ట్ర ప్రభుత్వం కొత్త రేషన్‌ కార్డుల పంపిణీకి ఏర్పాట్లు పూర్తి చేస్తోంది. రాష్ట్రవ్యాప్తంగా 1.05 కోట్లకు పైగా కుటుంబాలకు అందించేందుకు క్యూఆర్‌ కోడ్‌తో కూడిన కొత్త రేషన్‌ కార్డుల ముద్రణ ప్రక్రియ పూర్తయింది. ఇప్పటికే కార్డులను ఆయా జిల్లాలకు పంపించినట్లు పౌరసరఫరాల శాఖ వర్గాలు వెల్లడించాయి.

కొత్త రేషన్‌ కార్డుల పంపిణీ తేదీని ముఖ్యమంత్రి రేవంత్‌రెడ్డి ఖరారు చేయాల్సి ఉంది. సీఎం నిర్ణయం వెలువడిన వెంటనే రాష్ట్రవ్యాప్తంగా ఒకేసారి లేదా దశల వారీగా కార్డుల పంపిణీ చేపట్టనున్నట్లు అధికారులు తెలిపారు.

క్రెడిట్‌, డెబిట్‌ కార్డు తరహాలో కొత్త రూపం

ప్రస్తుతం ఉన్న పేపర్‌ రేషన్‌ కార్డులకు భిన్నంగా కొత్త కార్డులను క్రెడిట్‌, డెబిట్‌ కార్డు సైజులో రూపొందించారు. కార్డుపై లబ్ధిదారుడి ఫొటోతో పాటు పేరు, చిరునామా వంటి వివరాలు ముద్రించనున్నారు. కార్డుపై క్యూఆర్‌ కోడ్‌ కూడా ఉంటుంది.

క్యూఆర్‌ కోడ్‌ను స్కాన్‌ చేస్తే ఆ కుటుంబానికి సంబంధించిన సభ్యుల వివరాలు, ఇప్పటివరకు పొందిన రేషన్‌ సరుకుల వివరాలు తెలుసుకునే అవకాశం ఉంటుంది. బియ్యం, గోధుమలు, చక్కెర వంటి నిత్యావసర సరుకుల పంపిణీ వివరాలు కూడా డిజిటల్‌ రూపంలో అందుబాటులోకి రానున్నాయి.

బయోమెట్రిక్‌ విధానంలో రేషన్‌ పొందే అవకాశం

కొత్త కార్డుల ద్వారా రేషన్‌ పంపిణీ మరింత సులభతరం కానుంది. రేషన్‌ దుకాణానికి వెళ్లినప్పుడు క్యూఆర్‌ కోడ్‌ స్కాన్‌ చేయడం లేదా కార్డు సంఖ్యను నమోదు చేయడం ద్వారా కుటుంబంలోని ఎవరైనా బయోమెట్రిక్‌ ధ్రువీకరణతో రేషన్‌ పొందవచ్చు.

లబ్ధిదారులు ‘టి రేషన్‌’ యాప్‌ను మొబైల్‌లో డౌన్‌లోడ్‌ చేసుకుని ఓటీపీ ద్వారా తమ రేషన్‌ కార్డును అనుసంధానం చేసుకోవాల్సి ఉంటుంది. అనంతరం ఎం-పిన్‌ ఏర్పాటు చేసుకుని డిజిటల్‌ సేవలను వినియోగించుకోవచ్చు.

కార్డుల తయారీ ఖర్చు ప్రభుత్వమే భరిస్తుంది

కొత్త రేషన్‌ కార్డుల తయారీకి అయ్యే ఖర్చును పౌరసరఫరాల శాఖే భరిస్తుందని అధికారులు తెలిపారు. కార్డుల కోసం లబ్ధిదారులపై ఎలాంటి అదనపు ఆర్థిక భారం ఉండదని స్పష్టం చేశారు.

రాష్ట్రవ్యాప్తంగా ప్రస్తుతం 1,05,42,188కి పైగా రేషన్‌ కార్డులు ఉండగా, వాటి ద్వారా 3,39,96,239 మందికి పైగా లబ్ధిదారులు ప్రయోజనం పొందుతున్నారు. కొత్త డిజిటల్‌ రేషన్‌ కార్డుల అమలుతో పారదర్శకత పెరగడంతో పాటు రేషన్‌ పంపిణీ వ్యవస్థ మరింత సమర్థవంతంగా మారుతుందని అధికారులు భావిస్తున్నారు.