డిజిటల్‌ లావాదేవీల్లో భారత్‌లో మోసాల రేటు గ్లోబల్ సగటును మించిందని ట్రాన్స్‌యూనియన్ నివేదిక వెల్లడి

డిజిటల్‌ ఆర్థిక సేవలు, ఫిన్‌టెక్ వినియోగం వేగంగా పెరుగుతున్న నేపథ్యంలో దేశంలో సైబర్‌ మోసాల ముప్పు కూడా ఆందోళనకరంగా పెరుగుతోందని క్రెడిట్‌ బ్యూరో సంస్థ ట్రాన్స్‌యూనియన్‌ తన తాజా నివేదికలో వెల్లడించింది.

‘టాప్‌ ఫ్రాడ్‌ ట్రెండ్స్‌’ నివేదిక ప్రకారం, భారత్‌లో డిజిటల్‌ లావాదేవీల్లో మోసాల రేటు అంతర్జాతీయ సగటుతో పోలిస్తే గణనీయంగా ఎక్కువగా ఉంది. 2025లో దేశంలో జరిగిన మొత్తం డిజిటల్‌ లావాదేవీల్లో 7.1 శాతం మోసపూరితమైనవిగా గుర్తించగా, ప్రపంచ సగటు కేవలం 3.8 శాతంగా ఉంది. ఇది భారత్‌లో మోసాల స్థాయి దాదాపు రెట్టింపు అని సూచిస్తోంది.

లాజిస్టిక్స్, టెలికాం, బీమా వంటి రంగాలు సైబర్‌ మోసాలకు ఎక్కువగా గురవుతున్నాయని నివేదిక తెలిపింది. గుర్తింపు ధ్రువీకరణ, ఆథెంటికేషన్ లోపాలను ఉపయోగించుకుని మోసగాళ్లు రియల్‌టైమ్ లావాదేవీలను లక్ష్యంగా చేసుకుంటున్నారు.

విలువ పరంగా కూడా నష్టం ఎక్కువగానే ఉంది. భారత వినియోగదారులు సగటున 2,265 డాలర్లు (సుమారు రూ.2.04 లక్షలు) నష్టపోగా, ప్రపంచ సగటు 1,671 డాలర్లుగా నమోదైంది. ఇది భారత్‌లో సైబర్‌ మోసాల ఆర్థిక ప్రభావం ఎంత తీవ్రంగా ఉందో చూపిస్తోంది.

అలాగే 2025 ఆగస్టు–డిసెంబరు మధ్య కాలంలో 59 శాతం మంది వినియోగదారులు మోస ప్రయత్నాలను ఎదుర్కొన్నట్లు తెలిపారు. 13 శాతం మంది నిజంగా మోసానికి గురయ్యారు. అంతర్జాతీయ సగటు 10 శాతంగా ఉండగా ఇది ఎక్కువగా ఉంది.

సాధారణంగా ఇతర దేశాల్లో కొత్త అకౌంట్‌ సృష్టి సమయంలో మోసాలు ఎక్కువగా జరుగుతుంటే, భారత్‌లో మాత్రం లాగిన్ దశలోనే అధిక ప్రమాదం (3.9 శాతం) ఉన్నట్లు గుర్తించారు. దొంగిలించిన లేదా లీక్ అయిన పాస్‌వర్డ్‌లను ఉపయోగించి ఇప్పటికే ఉన్న ఖాతాలను హ్యాక్ చేయడం ఎక్కువగా జరుగుతోంది. కొత్త అకౌంట్ సృష్టిలో 3.1 శాతం, ఆర్థిక లావాదేవీల సమయంలో 1.2 శాతం మోసాలు నమోదయ్యాయి.

మొత్తంగా డిజిటలీకరణ వేగం పెరుగుతున్న కొద్దీ, భద్రతా వ్యవస్థలను మరింత బలోపేతం చేయాల్సిన అవసరం ఉందని నిపుణులు సూచిస్తున్నారు.