రూ.88 కోట్ల పెట్టుబడి మోసం కేసు.. విశాఖ రాథోడ్‌ను భారత్‌కు రప్పించిన సీబీఐ

రూ.88 కోట్ల పెట్టుబడి మోసం కేసులో పరారీలో ఉన్న ప్రధాన నిందితురాలు విశాఖ రాథోడ్‌ను కేంద్ర దర్యాప్తు సంస్థ (సీబీఐ) విజయవంతంగా స్వదేశానికి రప్పించింది. సీబీఐ, హోంశాఖ, విదేశాంగ శాఖల సమన్వయంతో ఇంటర్‌పోల్ ద్వారా రెడ్‌ కార్నర్‌ నోటీసులు జారీ చేయగా, యునైటెడ్‌ అరబ్‌ ఎమిరేట్స్‌ (యూఏఈ) అధికారులు ఆమెను భారత్‌కు డిపోర్ట్‌ చేశారు. ఇటీవలే ఆమె భర్త అవినాశ్ రాథోడ్‌ను కూడా భారత్‌కు పంపించిన విషయం తెలిసిందే.

మహారాష్ట్రలోని పుణెకు చెందిన అవినాశ్‌, విశాఖ రాథోడ్ దంపతులు అధిక లాభాలు వచ్చే పెట్టుబడి పథకాల పేరుతో ప్రజలను ఆకర్షించారు. తాము సూచించిన స్కీమ్‌లలో పెట్టుబడులు పెడితే ప్రతి నెల భారీ ఆదాయం వస్తుందని నమ్మించి వందలాది మంది నుంచి సుమారు రూ.88 కోట్లు సేకరించినట్లు ఆరోపణలు ఉన్నాయి. అనంతరం ఆ నిధులను వ్యక్తిగత ప్రయోజనాలకు వినియోగిస్తూ పలు బ్యాంకు ఖాతాలు, డీమ్యాట్ ఖాతాల ద్వారా మళ్లించినట్లు దర్యాప్తులో తేలింది.

ఈ వ్యవహారంపై 2023లో పుణెలోని చతుర్‌శ్రింగి పోలీస్ స్టేషన్‌లో కేసు నమోదు కాగా, దంపతులు అప్పటి నుంచి పరారీలో ఉన్నారు. దేశవ్యాప్తంగా గాలించినా వారి ఆచూకీ లభించకపోవడంతో విదేశాలకు పారిపోయినట్లు గుర్తించిన దర్యాప్తు సంస్థలు ఈ ఏడాది జూన్‌లో ఇద్దరిపై రెడ్‌ కార్నర్‌ నోటీసులు జారీ చేశాయి. అనంతరం యూఏఈ అధికారులు వారిని అదుపులోకి తీసుకుని భారత్‌కు డిపోర్ట్‌ చేశారు. జులై 23న భారత్‌కు చేరుకున్న అవినాశ్‌ను పోలీసులు అరెస్టు చేయగా, తాజాగా విశాఖ రాథోడ్‌ను కూడా పుణెలో మహారాష్ట్ర పోలీసులు అదుపులోకి తీసుకున్నారు.

పరారీలో ఉన్న ఆర్థిక నేరస్థులను స్వదేశానికి రప్పించే ప్రక్రియలో కేంద్ర ప్రభుత్వం మరింత దూకుడుగా వ్యవహరిస్తోంది. ఇంటర్‌పోల్‌, విదేశీ ప్రభుత్వాల సహకారంతో 2019 నుంచి ఇప్పటివరకు 36 దేశాల నుంచి మొత్తం 274 మంది పరారీలో ఉన్న నిందితులను భారత్‌కు తీసుకొచ్చినట్లు కేంద్ర ప్రభుత్వం ఇటీవల వెల్లడించింది. ఈ కేసు కూడా అంతర్జాతీయ స్థాయిలో దర్యాప్తు సంస్థల సమన్వయానికి మరో ఉదాహరణగా నిలిచింది.