ఇమ్రాన్ ఖాన్ తొలగింపు వెనుక అమెరికా హస్తం?

పాక్‌ రాజకీయాల్లో కొత్త వివాదం తెరపైకి వచ్చింది. మాజీ ప్రధాని ఇమ్రాన్ ఖాన్‌ను (Imran Khan) పదవి నుంచి తొలగించడం వెనుక అమెరికా (USA) హస్తం ఉందన్న ఆరోపణలు తాజాగా వెలుగులోకి వచ్చిన రహస్య దౌత్య పత్రం ద్వారా మరింత బలపడ్డాయి. ఈ పత్రాన్ని ఇన్వెస్టిగేటివ్ మీడియా సంస్థ ‘డ్రాప్ సైట్’ ప్రచురించగా, ఇందులోని వివరాలు అంతర్జాతీయంగా చర్చనీయాంశంగా మారాయి.

2022 ఏప్రిల్‌లో పాకిస్థాన్ అసెంబ్లీలో ఇమ్రాన్ ఖాన్ ప్రభుత్వంపై అవిశ్వాస తీర్మానం ప్రవేశపెట్టిన సమయంలో జరిగిన దౌత్య చర్చల వివరాలు ఈ పత్రంలో ఉన్నాయి. అప్పట్లో అమెరికాలోని పాకిస్థాన్ రాయబారి అసద్ మజీద్ ఖాన్‌తో అమెరికా హోంశాఖకు చెందిన దక్షిణ–మధ్య ఆసియా వ్యవహారాల సహాయ కార్యదర్శి డోనాల్డ్ లూ సమావేశమయ్యారని అందులో పేర్కొన్నట్లు సమాచారం. ఆ సమావేశంలో ఇమ్రాన్ ఖాన్‌ను పదవి నుంచి తొలగించడం, ఆయనపై చర్యలు తీసుకోవడం వంటివి అమెరికా–పాక్ సంబంధాల పరంగా ప్రయోజనకరమని చర్చ జరిగినట్లు ఆరోపణలు ఉన్నాయి.

అదే సమయంలో ఇమ్రాన్ ఖాన్ ప్రభుత్వం రష్యా–ఉక్రెయిన్ యుద్ధంపై తీసుకున్న తటస్థ వైఖరి అమెరికా అసంతృప్తికి కారణమై ఉండవచ్చని ఈ లీక్ పత్రం సూచిస్తోంది. ఇదే సమయంలో ఆయనకు వ్యతిరేకంగా పాక్ రాజకీయ వాతావరణం వేడెక్కి, అవిశ్వాస తీర్మానం ద్వారా ఆయన పదవి కోల్పోయారు. అనంతరం షెహబాజ్ షరీఫ్ ప్రధానిగా బాధ్యతలు స్వీకరించారు.

ఇమ్రాన్ ఖాన్ అప్పట్లో తనను పదవి నుంచి తొలగించడానికి అంతర్జాతీయ కుట్ర జరుగుతోందని ఆరోపించారు. అయితే ఈ ఆరోపణలను పాకిస్థాన్ ప్రభుత్వం, అమెరికా రెండూ ఖండించాయి. తర్వాత జరిగిన తోషాఖానా కేసులో ఆయనకు జైలు శిక్ష పడగా, అప్పటి నుంచి ఆయన జైల్లోనే ఉన్నారు.