భర్తను చంపించేందుకు సుపారీ గ్యాంగ్‌ను రంగంలోకి దించిన భార్య

ఏలూరు జిల్లా ఆగిరిపల్లి మండలంలో చోటుచేసుకున్న ఈ హత్య కేసు రాష్ట్రవ్యాప్తంగా సంచలనం రేపింది. వివాహేతర సంబంధం కారణంగా భర్తను అడ్డుగా భావించిన భార్యే హత్యకు కుట్ర చేసినట్లు వెలుగులోకి రావడం కలకలం సృష్టిస్తోంది.

పోలీసుల వివరాల ప్రకారం.. వడ్లమాను గ్రామానికి చెందిన బ్యాంక్ ఉద్యోగి రెడ్డి సులోమన్‌రాజు తన భార్య దుర్గామణి ప్రవర్తనపై అనుమానం వ్యక్తం చేయడంతో కుటుంబంలో విభేదాలు పెరిగాయి. ఈ క్రమంలో దుర్గామణికి అదే ప్రాంతానికి చెందిన వెంకన్నబాబుతో వివాహేతర సంబంధం ఏర్పడింది. విషయం భర్తకు తెలియడంతో గొడవలు తీవ్రమయ్యాయి.

ఈ నేపథ్యంలో భర్తను తొలగించాలనే ఉద్దేశంతో దుర్గామణి తన ప్రియుడు వెంకన్నబాబుతో కలిసి హత్యకు ప్రణాళిక వేసినట్లు పోలీసులు వెల్లడించారు. అనంతరం రూ.12 లక్షల సుపారీతో నలుగురు వ్యక్తులను రంగంలోకి దించి హత్య చేయించినట్లు దర్యాప్తులో తేలింది.

పథకం ప్రకారం నిందితులు సులోమన్‌రాజును ముందుగా మద్యం తాగించి ఒంటరిగా తీసుకెళ్లారు. అనంతరం గన్నవరం మండలం పరిధిలోని ప్రాంతానికి తీసుకెళ్లి ఛార్జింగ్ వైర్‌తో గొంతు బిగించి హత్య చేసినట్లు పోలీసులు తెలిపారు. హత్య అనంతరం ఆధారాలను మాయం చేసే ప్రయత్నం చేసినట్లు కూడా దర్యాప్తులో బయటపడింది.

ఈ ఘటనపై కేసు నమోదు చేసిన ఆగిరిపల్లి పోలీసులు సాంకేతిక ఆధారాలు, సీసీటీవీ ఫుటేజ్ ఆధారంగా విచారణ జరిపి భార్య దుర్గామణి, ప్రియుడు వెంకన్నబాబు సహా మొత్తం ఐదుగురు నిందితులను గన్నవరం ప్రాంతంలో అరెస్ట్‌ చేశారు.

నిందితుల నుంచి కార్లు, మొబైల్ ఫోన్లు, నేరానికి ఉపయోగించిన వస్తువులు, నగదు స్వాధీనం చేసుకున్నట్లు పోలీసులు వెల్లడించారు. కేసును వేగంగా ఛేదించిన పోలీసు అధికారులను ఎస్పీ అభినందించారు. ఈ ఘటనతో గ్రామంలో తీవ్ర ఉద్రిక్తత నెలకొంది.