వరల్డ్‌కప్ విజేత దూబే సైలెంట్ ట్రైన్ ట్రిప్!!

టీమ్‌ఇండియా వరుసగా రెండోసారి టీ20 ప్రపంచకప్‌ను గెలుచుకోవడంతో దేశవ్యాప్తంగా అభిమానులు సంబరాలు జరుపుకున్నారు. ఈ విజయంతో భారత ఆటగాళ్లకు ఎయిర్‌పోర్టుల్లో ఘన స్వాగతాలు లభించాయి. అయితే వరల్డ్‌కప్ విజేత జట్టులో సభ్యుడైన టీమ్‌ఇండియా ఆల్‌రౌండర్ శివమ్ దూబే మాత్రం అందరి దృష్టికి పడకుండా ముంబయికి చేరుకోవడానికి భిన్నమైన మార్గాన్ని ఎంచుకున్నాడు. విమాన ప్రయాణం కాకుండా రైలులో ప్రయాణించి నిశ్శబ్దంగా ముంబయికి చేరుకున్నాడు.

దూబే తెలిపిన వివరాల ప్రకారం, అహ్మదాబాద్ నుంచి ముంబయికి వెళ్లే సమయంలో ఫ్లైట్ టికెట్లు అందుబాటులో లేకపోవడంతో వెంటనే వెళ్లడానికి రైలు ప్రయాణాన్ని ఎంచుకున్నట్లు చెప్పారు. తన భార్య అంజుమ్ మరియు ఓ స్నేహితుడితో కలిసి తెల్లవారుజామున బయలుదేరే రైలులో థర్డ్ ఏసీ టికెట్లు బుక్ చేసుకున్నారు.

అభిమానులు గుర్తుపడకుండా ఉండేందుకు ముందస్తు జాగ్రత్తలు కూడా తీసుకున్నట్లు దూబే చెప్పారు. తలకు క్యాప్, ముఖానికి మాస్క్ ధరించి, ఫుల్ స్లీవ్ టీషర్ట్ వేసుకుని సాధారణ ప్రయాణికుడిలా స్టేషన్‌కు చేరుకున్నట్లు వివరించారు. ఉదయం 5.10 గంటలకు రైలు బయలుదేరే సమయం కావడంతో స్టేషన్‌లో జనసంచారం తక్కువగా ఉండటం తమకు అనుకూలంగా మారిందన్నారు.

అయితే ప్లాట్‌ఫారమ్‌పై ఎక్కువసేపు ఉండటం వల్ల ఎవరో గుర్తుపడే అవకాశం ఉండడంతో రైలు బయలుదేరే కొద్ది నిమిషాల ముందు స్టేషన్‌కు చేరుకుని త్వరగా రైలెక్కినట్లు చెప్పారు. అనంతరం అప్పర్ బెర్త్‌లోనే ఎక్కువసేపు విశ్రాంతి తీసుకుంటూ ప్రయాణం పూర్తి చేశానని తెలిపారు.

ముంబయిలో దిగిన తర్వాత కూడా అభిమానుల గుంపు నుంచి తప్పించుకోవడానికి స్థానిక పోలీసులను సంప్రదించినట్లు చెప్పారు. పోలీసులు మొదట ఆయన విమానంలో వస్తారని భావించారని, రైలు ప్రయాణం గురించి తెలిసి ఆశ్చర్యపోయారని వెల్లడించారు. చివరికి పోలీసుల ఎస్కార్ట్‌తో స్టేషన్ నుంచి సురక్షితంగా బయటకు వచ్చానని తెలిపారు.

తన పిల్లలను త్వరగా చూడాలనే ఆత్రంతో ఈ ప్రయాణం చేశానని, ఈ మొత్తం ప్రణాళిక తన భార్య అంజుమ్ ఆలోచన అని శివమ్ దూబే పేర్కొన్నారు. అభిమానుల హంగామా నుంచి దూరంగా ఉండేందుకు చేసిన ఈ రిస్కీ రైలు ప్రయాణం ఇప్పుడు సోషల్ మీడియాలో చర్చనీయాంశంగా మారింది.