జమ్మూకు చెందిన ఓంకార్ సింగ్ బాత్రా చిన్న వయసులోనే సాంకేతిక రంగంలో అసాధారణ ప్రతిభను చాటుకున్నాడు. కేవలం ఏడేళ్ల వయసులోనే వెబ్సైట్ను రూపొందించి ప్రపంచంలోనే అతి పిన్న వయస్కుడైన వెబ్మాస్టర్గా గిన్నిస్ రికార్డుల్లో చోటు సంపాదించాడు. అక్కడితో ఆగకుండా పుస్తక రచన, ఉపగ్రహాల రూపకల్పన, అంతరిక్ష పరిశోధనలు, స్టార్టప్ రంగాల్లో వరుస విజయాలు సాధించాడు.
చిన్నతనం నుంచే కంప్యూటర్లు, సాంకేతికతపై ఆసక్తి పెంచుకున్న ఓంకార్కు తండ్రి సమాచార సాంకేతిక రంగంలో పనిచేయడం కూడా కలిసొచ్చింది. ఏడేళ్ల వయసులోనే వెబ్సైట్ రూపొందించి తన ప్రతిభను నిరూపించుకున్నాడు. 12 ఏళ్లకే ‘వెన్ ది టైమ్ స్టాప్స్’ అనే పుస్తకాన్ని రచించాడు.
పాఠశాల విద్య కొనసాగుతున్న సమయంలోనే అతడి ఆసక్తి అంతరిక్ష రంగం వైపు మళ్లింది. 13 ఏళ్ల వయసులో ‘అపోలింక్’ అనే అంతరిక్ష సాంకేతిక సంస్థను ప్రారంభించాడు. కొవిడ్ సమయంలో రూపొందించిన ఓ పరస్పర చర్యల వేదికకు గుర్తింపుగా ప్రధానమంత్రి రాష్ట్రీయ బాల పురస్కార్ అందుకున్నాడు.
16 ఏళ్ల వయసులో ‘ఇన్క్యూబ్’ పేరుతో ఉపగ్రహాన్ని రూపొందించి పరిశోధనలు చేపట్టాడు. దీని రూపకల్పనను ప్రజలకు అందుబాటులో ఉంచడంతో పాటు, భారతదేశపు తొలి ఓపెన్-సోర్స్ ఉపగ్రహంగా గుర్తింపు పొందింది. పాఠశాల విద్య పూర్తికాకముందే ఐఐటీ జమ్మూలోని ఇంజినీరింగ్ విద్యార్థులకు అంతరిక్ష వ్యవస్థలపై బోధించే అవకాశం కూడా ఓంకార్కు లభించింది.
19 ఏళ్ల వయసులో తన స్టార్టప్ కోసం 4.3 మిలియన్ డాలర్ల పెట్టుబడిని సమీకరించాడు. ప్రస్తుతం ఉపగ్రహాల తయారీ, అంతరిక్ష సమాచార వ్యవస్థల అభివృద్ధిపై ఓంకార్ దృష్టి సారిస్తున్నాడు. భూమికి సమీప కక్ష్యలోని ఉపగ్రహాలు భూమి నుంచి కనిపించని సమయంలోనూ వాటితో నిరంతరంగా అనుసంధానం కొనసాగించే కమ్యూనికేషన్ మౌలిక వ్యవస్థను అభివృద్ధి చేయడం ‘అపోలింక్’ ప్రధాన లక్ష్యంగా ఉంది.
ఇటీవల స్పేస్ఎక్స్ మిషన్లో తాను రూపొందించిన తొలి ఉపగ్రహాన్ని ప్రయోగించడం ద్వారా ఓంకార్ తన అంతరిక్ష ప్రయాణంలో మరో కీలక అడుగు వేశాడు. చిన్న వయసులోనే సాంకేతికతను తన భవిష్యత్తుగా ఎంచుకుని, వెబ్సైట్ నుంచి ఉపగ్రహాల వరకు సాగిన అతడి ప్రయాణం యువతకు స్ఫూర్తిగా నిలుస్తోంది.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsToday NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews WorldNews
