అమెజాన్ ప్రైమ్‌లో భయపెట్టే థ్రిల్లర్ రెడీ..!

త్రిగుణ్, అఖిల్ రాజ్, హెబ్బా పటేల్ ప్రధాన పాత్రల్లో నటించిన హారర్ థ్రిల్లర్ ‘ఈషా’ ఇప్పుడు ఓటీటీలో అందుబాటులోకి వచ్చింది. గతేడాది థియేటర్లలో విడుదలైన ఈ చిత్రం కొద్ది రోజుల క్రితం విదేశాల్లో స్ట్రీమింగ్ ప్రారంభమైంది. తాజాగా ఇది భారత్‌లో కూడా అమెజాన్ ప్రైమ్ వీడియో వేదికగా స్ట్రీమింగ్ అవుతోంది.

శ్రీనివాస్ మన్నె దర్శకత్వం వహించిన ఈ చిత్రంలో సిరి హనుమంతు, పృథ్వీరాజ్ కీలక పాత్రలు పోషించారు. కథలో సస్పెన్స్, సూపర్‌నేచురల్ ఎలిమెంట్స్, థ్రిల్లింగ్ మోమెంట్స్ ప్రేక్షకులను కట్టిపడేస్తాయి.

కథ ఏంటి?

కల్యాణ్ (త్రిగుణ్), వినయ్ (అఖిల్ రాజ్), నయన (హెబ్బా పటేల్), అపర్ణ (సిరి హనుమంతు) చిన్నప్పటి నుంచి స్నేహితులు. దెయ్యాలు, ఆత్మలు లేవని గట్టిగా నమ్మే వీరు మూఢనమ్మకాలతో ప్రజలను మోసం చేసే బాబాలు, దొంగ స్వామీజీలను బయటపెట్టడం తమ లక్ష్యంగా పెట్టుకుంటారు.

ఈ క్రమంలో ఆంధ్ర-ఒడిశా సరిహద్దులో జీవిస్తున్న ఆది దేవ్ బాబా (పృథ్వీరాజ్) గురించి తెలుసుకుంటారు. అతని మోసాన్ని బయటపెట్టాలని నిర్ణయించుకుంటారు. కానీ ఆది దేవ్ వాళ్లకు ఒక సవాల్ విసురుతాడు – “ఆత్మలు ఉన్నాయని నిరూపిస్తాను.”

ఆ సవాల్‌లో భాగంగా ఈ నలుగురు మిత్రులు మూడు రోజుల పాటు ఒక పాడుబడిన బంగ్లాలో ఉండేందుకు సిద్ధమవుతారు. అక్కడ మొదలయ్యే భయానక అనుభవాలు, అనుకోని సంఘటనలు కథను మరింత ఉత్కంఠభరితంగా మలుస్తాయి.

ఒక గిరిజనుడి శరీరంలోకి ప్రవేశించిన పుణ్యవతి ఆత్మ ఎవరు? ఆమెకి ఈ నలుగురిపై పగ ఎందుకు? నిజంగా ఆ బంగ్లాలో ఆత్మలున్నాయా? లేక ఇది అంతా ఒక కుట్రా? అనే ప్రశ్నలకు సమాధానం సినిమా చూసి తెలుసుకోవాలి.