ఉంగరాల జుట్టు అందంగా, ఆరోగ్యంగా ఉండాలంటే ఇవి పాటించండి!

ఉంగరాల జుట్టు సహజంగానే అందంగా కనిపించినా.. దాన్ని మెయింటెయిన్‌ చేయడం కొంత కష్టమే. ముఖ్యంగా పొడిబారడం, చిక్కులు పడటం, జుట్టు చివర్లు చిట్లిపోవడం వంటి సమస్యలు కర్లీ హెయిర్‌ ఉన్నవారిని ఇబ్బంది పెడుతుంటాయి. సరైన హెయిర్‌ కేర్‌ రొటీన్‌ను పాటిస్తే జుట్టును ఆరోగ్యంగా, మృదువుగా, ఆకర్షణీయంగా ఉంచుకోవచ్చు.

రోజూ తలస్నానం చేయడం వల్ల సహజ నూనెలు తగ్గి జుట్టు మరింత పొడిబారే అవకాశం ఉంటుంది. కాబట్టి జుట్టు తత్వాన్ని బట్టి వారానికి రెండు, మూడుసార్లు తలస్నానం చేయడం మంచిది. షాంపూ ఉపయోగించిన తర్వాత కండిషనర్‌ తప్పనిసరిగా రాయాలి. ఇది జుట్టుకు తేమను అందించడంలో సహాయపడుతుంది. వేడి నీటికి బదులుగా గోరువెచ్చటి లేదా చల్లటి నీటిని ఉపయోగించడం మంచిది.

కర్లీ హెయిర్‌కు తేమ చాలా ముఖ్యం. అందుకే కొబ్బరి నూనె వంటి నూనెలతో అప్పుడప్పుడు జుట్టుకు మర్దన చేయవచ్చు. అయితే ప్రతి ఒక్కరి జుట్టు, చర్మ తత్వం భిన్నంగా ఉంటుంది కాబట్టి ఏ నూనె సరిపోతుందో ముందుగా తెలుసుకోవడం మంచిది.

తడిగా ఉన్న జుట్టును గట్టిగా దువ్వడం లేదా టవల్‌తో రుద్దడం వల్ల వెంట్రుకలు దెబ్బతినే అవకాశం ఉంటుంది. అందుకే మృదువైన కాటన్‌ క్లాత్‌తో జుట్టులోని నీటిని సున్నితంగా తొలగించి, వీలైనంత వరకు సహజంగా ఆరనివ్వాలి. జుట్టు చిక్కులు తీసేటప్పుడు వెడల్పాటి పళ్లున్న దువ్వెనను ఉపయోగించడం సౌకర్యంగా ఉంటుంది.

అలాగే తడిగా ఉన్న కర్లీ హెయిర్‌ను బిగుతుగా జడ వేయడం లేదా గట్టిగా ముడేయడం నివారించాలి. ఇలా చేయడం వల్ల జుట్టుపై ఒత్తిడి పెరిగి విరిగిపోయే అవకాశం ఉంటుంది. షియా బటర్‌, నువ్వుల నూనె వంటి మాయిశ్చరైజింగ్‌ పదార్థాలు కూడా కొన్ని హెయిర్‌ కేర్‌ రొటీన్‌లలో ఉపయోగిస్తారు.

ఇంట్లో తయారు చేసుకునే హెయిర్‌ స్ప్రేల విషయంలో మాత్రం జాగ్రత్త అవసరం. ముఖ్యంగా ఎసెన్షియల్‌ ఆయిల్స్‌ను నేరుగా లేదా అధిక మోతాదులో జుట్టు, తలకు అప్లై చేయకుండా తగిన విధంగా డైల్యూట్‌ చేయాలి. ఏదైనా పదార్థం ఉపయోగించినప్పుడు ముందుగా చిన్న ప్రాంతంలో పరీక్షించడం మంచిది.