ఉద్యోగ మార్కెట్‌లో మార్పులు వేగంగా చోటుచేసుకుంటున్నాయి. ఒకప్పుడు డిగ్రీ, వైట్‌ కాలర్‌ ఉద్యోగాలకే ఎక్కువ ప్రాధాన్యం ఉండగా.. ఇప్పుడు ప్రాక్టికల్‌ స్కిల్స్‌ ఉన్న వారికి కూడా విస్తృత అవకాశాలు లభిస్తున్నాయి. ఎలక్ట్రీషియన్, ప్లంబర్, వెల్డర్, ఫిట్టర్, మెకానిక్, టెక్నీషియన్, మెషినిస్ట్, డ్రైవర్‌ వంటి వృత్తుల్లో నైపుణ్యం ఉన్నవారికి దేశీయంగానే కాకుండా విదేశాల్లోనూ డిమాండ్‌ పెరుగుతోంది.
ముఖ్యంగా ఏఐ, డేటా సెంటర్లు, తయారీ, ఈవీ, సోలార్, సెమీకండక్టర్, ఎలక్ట్రానిక్స్‌ వంటి రంగాలు విస్తరిస్తుండటంతో నైపుణ్యం కలిగిన సిబ్బంది అవసరం మరింత పెరుగుతోంది. డేటా సెంటర్లలో విద్యుత్‌ వ్యవస్థలు, కూలింగ్‌ సిస్టమ్స్, రోబోటిక్‌ పరికరాల నిర్వహణకు ఎలక్ట్రీషియన్లు, మెకానిక్‌లు, హెచ్‌వీఏసీ టెక్నీషియన్లు, ప్లంబర్లు వంటి నిపుణులు అవసరమవుతున్నారు.
ఇటీవల సంవత్సరాల్లో బ్లూ కాలర్‌ ఉద్యోగాల సంఖ్య గణనీయంగా పెరిగినట్లు వివిధ పరిశ్రమల అధ్యయనాలు సూచిస్తున్నాయి. అనుభవం, నైపుణ్యం పెరిగేకొద్దీ ఈ ఉద్యోగాల్లో ఆదాయ అవకాశాలు కూడా మెరుగవుతున్నాయి. కొన్ని ప్రత్యేక నైపుణ్యాలు కలిగిన మెకానిక్‌లు, ప్లాంట్‌ ఆపరేటర్లు, నిర్మాణ రంగ సిబ్బంది, ఎలక్ట్రీషియన్లకు మంచి వేతనాలు లభిస్తున్నాయి.
విదేశీ అవకాశాల పరంగానూ బ్లూ కాలర్‌ ఉద్యోగాలకు ప్రాధాన్యం పెరుగుతోంది. జపాన్, యూకే, యూఏఈ, యూరప్‌ తదితర ప్రాంతాల్లో నిర్మాణం, తయారీ, లాజిస్టిక్స్, హాస్పిటాలిటీ, ఆరోగ్య సేవలు వంటి రంగాల్లో నైపుణ్యం ఉన్న సిబ్బందికి అవకాశాలు ఉన్నాయి. తెలుగు రాష్ట్రాల ప్రభుత్వ సంస్థలు కూడా విదేశీ ఉద్యోగాల కోసం యువతకు నైపుణ్య, భాషా శిక్షణ అందించే కార్యక్రమాలను చేపడుతున్నాయి.
ఈ రంగంలోకి ప్రవేశించాలనుకునే వారికి ఐటీఐ, పాలిటెక్నిక్, ఒకేషనల్‌ కోర్సులు, అప్రెంటిస్‌షిప్‌ వంటి మార్గాలు ఉపయోగపడతాయి. ప్రాక్టికల్‌ శిక్షణతో పాటు పని అనుభవం పొందడం ద్వారా కెరీర్‌లో ముందుకు వెళ్లే అవకాశం ఉంటుంది. సర్వీస్‌ సెంటర్లు, వర్క్‌షాపులు ఏర్పాటు చేసుకుని స్వయం ఉపాధి పొందే అవకాశాలు కూడా ఉన్నాయి.
ప్రస్తుతం ఉద్యోగ మార్కెట్‌లో విద్యార్హతలతో పాటు ‘ఏం చేయగలరు?’ అనే ప్రశ్నకు ప్రాధాన్యం పెరుగుతోంది. సాంకేతికత అభివృద్ధి చెందుతున్న కొద్దీ వాటిని ఏర్పాటు చేయడం, నిర్వహించడం, మరమ్మతులు చేయడం వంటి పనులకు మానవ నైపుణ్యాల అవసరం కొనసాగుతూనే ఉంటుంది. దీంతో సరైన శిక్షణ, అనుభవం, నైపుణ్యం ఉన్న యువతకు బ్లూ కాలర్‌ రంగంలో దేశీయ, అంతర్జాతీయ అవకాశాలు విస్తరిస్తున్నాయి.
Andhra pradesh Andhrapradesh APNews BreakingNews Breaking news BusinessNews CricketNews CrimeNews Crime News EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews Wellness WorldNews
