స్వచ్ఛాంధ్ర–స్వర్ణాంధ్ర కార్యక్రమంలో పాల్గొన్న ముఖ్యమంత్రి

స్వచ్ఛాంధ్ర–స్వర్ణాంధ్ర కార్యక్రమంలో భాగంగా ముఖ్యమంత్రి N. Chandrababu Naidu వినుకొండకు చేరుకున్నారు. ప్రభుత్వ కళాశాల హెలీప్యాడ్ వద్ద దిగిన సీఎం, ఎన్ఎస్పీ మైదానంలోని ప్రజావేదికకు వెళ్లి కార్యక్రమంలో పాల్గొన్నారు. కూటమి నేతలు, అధికారులు ఆయనకు స్వాగతం పలికారు.

ప్రజావేదికలో మాట్లాడుతూ, 2025 జనవరిలో ప్రారంభించిన స్వర్ణాంధ్ర–స్వచ్ఛాంధ్ర కార్యక్రమం రాష్ట్రవ్యాప్తంగా ముమ్మరంగా కొనసాగుతోందని తెలిపారు. డిప్యూటీ సీఎం Pawan Kalyan, మంత్రి నారాయణ నేతృత్వంలో ఈ కార్యక్రమాలు పెద్ద ఎత్తున నిర్వహిస్తున్నామని పేర్కొన్నారు. “మన ఇంటిని శుభ్రంగా ఉంచుకున్నట్లే వీధులు, రోడ్లు కూడా పరిశుభ్రంగా ఉంచే బాధ్యత మనందరిదీ” అని పిలుపునిచ్చారు.గత ప్రభుత్వాల నిర్లక్ష్యంతో 108 లక్షల మెట్రిక్ టన్నుల చెత్త పేరుకుపోయిందని, అది భూమి, భూగర్భజలాలు, వాతావరణాన్ని కలుషితం చేసి ప్రజల ఆరోగ్యంపై ప్రభావం చూపిందని సీఎం విమర్శించారు. అందుకే చెత్తను పూర్తిగా తొలగించే సమగ్ర కార్యక్రమం చేపట్టామని వివరించారు.

మున్సిపాలిటీల్లో 97 శాతం మేర ఇంటింటికీ చెత్త సేకరణ జరుగుతోందని, గ్రామీణ ప్రాంతాల్లో మార్చి నాటికి వందశాతం డోర్ టు డోర్ కలెక్షన్ లక్ష్యంగా పెట్టుకున్నామని తెలిపారు. తడి, పొడి చెత్తను వేరు చేసి హోం కాంపోస్టింగ్ ద్వారా ఎరువుగా మార్చుకోవాలని సూచించారు. రాష్ట్రవ్యాప్తంగా 4 లక్షలకుపైగా కుటుంబాలు టెర్రస్ గార్డెనింగ్ కోసం కాంపోస్టు వినియోగిస్తున్నాయని చెప్పారు.

చెత్త నుంచి సంపద సృష్టించే దిశగా విశాఖ, గుంటూరులో విద్యుత్ ఉత్పత్తి ప్లాంట్లు పనిచేస్తున్నాయని, రాజమండ్రి సహా మరో ఐదు ప్రాంతాల్లో ప్లాంట్లు ఏర్పాటు చేయనున్నట్లు వెల్లడించారు. సింగిల్ యూజ్ ప్లాస్టిక్‌పై నిషేధం విధించామని, పరిశుభ్రతలో మెరుగైన ప్రదర్శన కనబరచిన వారిని స్వచ్ఛ భారత్ అవార్డులతో సత్కరిస్తున్నామని తెలిపారు.

కార్యక్రమం అనంతరం వినుకొండ పట్టణ ప్రభుత్వ ఆస్పత్రిని సందర్శించిన సీఎం, బయోమెడికల్ వ్యర్థాల నిర్వహణపై సమీక్ష నిర్వహించారు. పరిశుభ్రతే ఆరోగ్యానికి పునాది అని, మలేరియా, డెంగ్యూ వంటి వ్యాధులను అరికట్టాలంటే తడి వ్యర్థాల నిర్వహణ కీలకమని పేర్కొన్నారు.“జపాన్ ప్రజల తరహాలో మనం కూడా చెత్త విషయంలో అలవాట్లు మార్చుకోవాలి. పరిశుభ్రమైన ఆంధ్రప్రదేశ్ కోసం ప్రతి ఒక్కరూ బాధ్యత తీసుకోవాలి” అని సీఎం చంద్రబాబు పిలుపునిచ్చారు.