ఇరాన్‌పై అమెరికా దాడులు.. యుద్ధ నేరాలేనన్న ఐరాస బృందం

ఇరాన్‌పై 2026 ఫిబ్రవరిలో జరిగిన సైనిక దాడుల్లో అమెరికా యుద్ధ నేరాలకు పాల్పడి ఉండొచ్చని ఐక్యరాజ్యసమితి మానవ హక్కుల మండలి నియమించిన స్వతంత్ర అంతర్జాతీయ నిజనిర్ధారణ బృందం పేర్కొంది. రెండు కీలక దాడులపై పరిశీలన జరిపిన అనంతరం అమెరికా ప్రమేయం, అంతర్జాతీయ మానవతా చట్టాల ఉల్లంఘనకు సంబంధించి ‘సహేతుకమైన ఆధారాలు’ ఉన్నాయని తెలిపింది.

నిజనిర్ధారణ బృందం ప్రస్తావించిన ఘటనల్లో ఒకటి ఇరాన్‌లోని మినాబ్‌లో శజరెహ్‌ తయిబెహ్‌ పాఠశాలపై జరిగిన క్షిపణి దాడి. ఫిబ్రవరి 28న జరిగిన ఈ దాడిలో పెద్ద సంఖ్యలో పౌరులు, ముఖ్యంగా చిన్నారులు ప్రాణాలు కోల్పోయారు. ఈ దాడికి అమెరికా దళాలే కారణమై ఉండొచ్చని అమెరికా సైనిక దర్యాప్తులోనూ ప్రాథమికంగా వెల్లడైనట్లు గతంలో వచ్చిన నివేదికలు పేర్కొన్నాయి.

మరో ఘటన లామెర్డ్‌లోని స్పోర్ట్స్‌ కాంప్లెక్స్‌, దాని సమీపంలోని నివాస ప్రాంతంపై జరిగిన దాడి. ఈ రెండు ఘటనల్లో కలిపి కనీసం 178 మంది పౌరులు మరణించినట్లు ఐరాస బృందం తెలిపింది. అయితే లామెర్డ్‌ దాడికి అమెరికా సెంట్రల్‌ కమాండ్‌ బాధ్యతను ఖండించినట్లు AP పేర్కొంది.

పౌరులు, ముఖ్యంగా పిల్లలు ఉన్న ప్రాంతాలపై దాడులు జరగడం, లక్ష్యాల ఎంపికలో అవసరమైన జాగ్రత్తలు తీసుకున్నారా అనే అంశాలపై అంతర్జాతీయ మానవతా చట్టం ప్రకారం ప్రశ్నలు తలెత్తుతున్నాయని మానవ హక్కుల సంస్థలు గతంలోనూ పేర్కొన్నాయి.

ఇదే సమయంలో ఇరాన్‌ ప్రభుత్వంపై కూడా ఐరాస నిజనిర్ధారణ బృందం తీవ్ర ఆరోపణలు చేసింది. ప్రభుత్వ వ్యతిరేక నిరసనల అణచివేతలో అక్రమ హత్యలు, హింస, అక్రమ నిర్బంధాలు, బలవంతపు అదృశ్యాలు వంటి చర్యలు చోటుచేసుకున్నాయని, ఇవి మానవత్వానికి వ్యతిరేకమైన నేరాల పరిధిలోకి వస్తాయని పేర్కొంది. దీంతో విదేశీ సైనిక దాడులు, అంతర్గత అణచివేత మధ్య ఇరాన్‌ పౌరులు తీవ్ర మానవతా సంక్షోభాన్ని ఎదుర్కొన్నారని నివేదికలో వివరించింది.