కూరగాయల ముసుగులో నడిచిన గంజాయి స్మగ్లింగ్‌

అల్లూరి జిల్లాలో బయటపడిన ఈ గంజాయి రవాణా కేసు రాష్ట్రవ్యాప్తంగా చర్చనీయాంశమైంది. స్మగ్లర్లు తమ అక్రమ దందాను ఎంత చాకచక్యంగా నిర్వహించారో పోలీసుల విచారణలో బయటపడింది. వాహనాల బాడీ కింద ప్రత్యేకంగా ఇనుప పలకలతో రహస్య అరలు తయారు చేసి, బయటకు ఏ మాత్రం అనుమానం రాకుండా కూరగాయల లోడును అమర్చేవారు. చెక్‌పోస్టుల వద్ద సాధారణంగా కూరగాయల వాహనాలపై పెద్దగా అనుమానం ఉండదన్న విషయాన్ని ఉపయోగించుకుని ముఠా ఈ మార్గాన్ని ఎంచుకుంది.

ఒడిశాలోని సరిహద్దు ప్రాంతాల నుంచి తక్కువ ధరకు గంజాయి కొనుగోలు చేసి, తమిళనాడు వంటి ఇతర రాష్ట్రాల్లో అధిక ధరలకు విక్రయించడం ఈ ముఠా ప్రధాన లక్ష్యంగా పెట్టుకుంది. ఒక్కో ట్రిప్‌లో లక్షల రూపాయల లాభం వస్తుండటంతో ఇదే వ్యాపారాన్ని కొనసాగించినట్లు పోలీసులు అనుమానిస్తున్నారు. ఇప్పటివరకు 12 సార్లు ఇదే విధంగా రవాణా చేసి తప్పించుకున్నట్లు నిందితులు ఒప్పుకున్నట్టు సమాచారం.

పోలీసులకు ముందస్తు సమాచారం అందడంతో ప్రత్యేక నిఘా ఏర్పాటు చేసి వాహనాలను అడ్డగించారు. అనకాపల్లి జిల్లా నాతవరం మండలం వెదురుపల్లి వద్ద తనిఖీలు నిర్వహించగా రహస్య అరలు బయటపడ్డాయి. ప్యాకెట్లను విప్పి చూసినప్పుడు భారీగా గంజాయి ఉన్నట్టు గుర్తించారు.ఈ కేసులో అరెస్టైన వారిపై ఎన్డీపీఎస్‌ చట్టం కింద కేసులు నమోదు చేశారు. పరారీలో ఉన్న నిందితుల కోసం ప్రత్యేక బృందాలు గాలింపు చర్యలు చేపట్టాయి. సరిహద్దు ప్రాంతాల్లో చెక్‌పోస్టులను మరింత బలోపేతం చేసి డ్రగ్స్ రవాణాపై కఠిన చర్యలు తీసుకుంటామని అధికారులు తెలిపారు.

స్థానికంగా ఈ ఘటన కలకలం రేపింది. యువతను మత్తు పదార్థాల బారిన పడనివ్వకుండా పోలీసులు కట్టుదిట్టమైన చర్యలు కొనసాగిస్తామని స్పష్టం చేశారు. డ్రగ్స్ రవాణా, వినియోగంపై ప్రజలు కూడా అప్రమత్తంగా ఉండాలని, అనుమానాస్పద సమాచారం ఉంటే వెంటనే పోలీసులకు తెలియజేయాలని విజ్ఞప్తి చేశారు.